VOV4.K’ho - Drim òr (24/06), tàm hìu lơh broă Chính phủ, Phó Thủ tướng ồng Vũ Đức Đam, Kuang atbồ mpồl đơng lam Dà lơgar bè sơndră mờ kòp Covid-19 gơtờp, pơrjum pờ tơlĭk tàm internet mờ kuang bàng càr Đồng Nai bè ală broă sơndră mờ kòp gơtờp tŭ do.

Đơs tàm dơ̆ đơng lam pơrjum, Phó Thủ tướng ồng Vũ Đức Đam sồr tơnkah, càr Đồng Nai geh ù tiah rềp bal mờ ƀòn dờng Hồ Chí Minh, rơlao nggùl tơlăk nă công nhân tàm tiah lơh sa mờ măi mŏk, geh anih ơhò ơm, tìp bal mờ càr Bình Dương,... di lah lời kòp gơtờp gơtìp “kal ke ngan” den tàng pal sền gròi nền nòn cau lòt bơh ƀòn dờng Hồ Chí Minh, càr Bình Dương tus càr Đồng Nai mờ sơlơ̆u wơl. Phó Thủ tướng đơs tờm: sền gròi nền nòn ờ di là “bơ̆t dà, kơrian drà”, mờ là pal chồl pràn broă ngui công nghệ thông tin nàng sền gròi cau lòt rê.

Gơwèt mờ công nhân, tàm hơ̆ uă ngan là ală cau gam kis tàm tiah ndai, lơh broă tàm ală mpồl lơh sa kă bro tàm càr Đồng Nai, kung pal geh broă atbồ geh tơngai lòt rê mùl màl tus tơl gah lơh broă, hìu măi.

Cau mblàng Ndong Brawl