VOV4.K’ho- Càr Gia Lai neh tơnguh broă lơh jăt ală tơngu me lam sồr bè dơ̆ tĕ khà kuang bàng Quốc hội khoă 15 mờ kuang bàng HĐND ală cấp tơngai lơh broă bơh nam 2021 tus 2026 gơwèt mờ tiah làng bol kòn cau mờ uă broă lơh mùl màl, di pal mờ bơta chài rơgơi tơl jơi bơtiàn kòn cau dê.

Jăt mờ hơ̆, càr Gia Lai neh jào anih lơh broă tờm sền sơwì ală tơngu me jơnau lam sồr di pal, mùl màl, ƀuơn wă, ƀuơn iăt mờ mblàng gơs bàr dà đơs: dà yoan mờ dà kòn cau Jarai nàng làng bol in wă, ƀuơn lơh. Tơngu me lam sồr tơrgùm tàm tơngu me, bơta kuơ màng bơh dơ̆ tĕ khà; ală jơnau yal adăt boh lam gơrềng bal bè sơnoa boh lam nam 2013, adăt tĕ khà kuang bàng Quốc hội mờ tĕ khà kuang bàng HĐND; ală sră nggal bơto sồr bè dơ̆ tĕ khà bơh Dà lơgar dê, bơh Uỷ ban Thường vụ Quốc hội mờ Hội đồng tĕ khà Dà lơgar.

Kờñ broă lam sồr mùl màl geh cồng nha, Uỷ ban tĕ khà ală cấp tàm càr Gia Lai neh hòi jà bơta pràn là kra ƀòn, cau geh bơngă pin dờn tàm ală ƀòn tus bal tàm broă lam sồr.

Cau mblàng Ndong Brawl