VOV4.K’ho - Bŭ lah gơtìp aniai bơh kòp Covid-19, mơya tàm 6 nhai bồ nam 2021, khà gơguh lơh sa tàm càr Gia Lai gam geh 9,7%, gơguh uă rơlao 2 dơ̆ pơn drờm mờ tŭ do nam lài. Jơnau yal do geh yal tàm dơ̆ sơn đờm pơrjum dơ̆ 2, tơngai lơh broă bơh nam 2021 tus 2026 bơh HĐND càr Gia Lai dê geh bơyai lơh drim òr (09/08) tàm ƀòn dờng Pleiku. Jăt jơnau yal tàm pơrjum, mờ kờp jơh khà phan geh lơh tàm càr geh 9,7%, khà gơguh lơh sa 6 nhai bồ nam 2021 bơh càr Gia Lai geh uă rơlao 2,33 dơ̆ pơn drờm mờ tŭ do nam 2020.

Kung tàm 6 nhai bồ nam, càr neh lơh jăt ndrờm bal ală broă rơcang sơndră mờ kòp Covid-19 gơtờp tàm mpồl bơtiàn, broă cĭt sơnơm rơcang sơndră mờ kòp Covid-19 ai rơlao 47 rơbô 800 nă cau, gơwèt cau geh ai lài in. Tàm pơrjum dơ̆ 2, tơngai bơh nam 2021 tus 2026, HĐND càr Gia Lai kờp dŭ geh geh bơyai lơh tàm 2 ngai bơh ngai 9 tus ngai 10 nhai 8, geh sền wơl, ring bal 12 pang sră yal mờ rơndăp broă nghị quyết. Tàm hơ̆, jơnau yal bè broă lơh wơl Nghị quyết sồ 100 bơh HĐND bè broă sền wơl, lơh niam wơl lơh broă rơndăp 3 bơta brê (tơngai bơh nam 2025 tus 2030) gam geh hòi jà broă sền gròi uă ngan bơh mpồl bơtiàn.

Cau mblàng Ndong Brawl