VOV4.K’ho- Mho ngai 11/5, tàm dơ̆ pơrjum pờ tơlik tơn tàm internet mờ 10 kơnhoàl, ƀòn dờng bơh càr dê, ồng Lê Ngọc Tuấn Chủ tịch Ủy ban Nhân dân càr, Kuang ătbồ Mpồl đơng lam rơcăng sơndră kòp Covid-19 càr Kon Tum dê đơs nền, ai lài sền gàr anih lơh broă, anih ơm anih sa ai ală cau tàm tiah lam lài tam dră mờ kòp Covid-19 in.

Cau lơh sơnơm kham sền bơta duh să jan cau mŭt tàm càr Kon Tum tàm Gùng rơndeh 14

Tềng đăp bơta gơbàn kal ke, ờ gơtùi gĭt lài bơh kòp bơtờp dê, càr Kon Tum gam ai lơh broă sùm 4 anih lòt sền, mpồl làm gah tàm 3 gơl gùng, tàm hơ̆ geh: Gùng rơndeh dờng 14, 24 mờ 40B. Bal mờ hơ̆, tàm 2 gơl gùng tiah nhàr lơgar jòng rlau 292 kơi sồ rềp nhàr bal mờ lơgar Lào bal mờ Campuchia, mpồl ling sền gàr tiah nhàr lơgar pơgồp bal mờ Gah đơng lam ling klàng càr dê ai lơh broă sùm 70 mpồl, anih rơcăng sơndră kòp Covid-19.

Gĭt nền broă lơh rơcăng sơndră kòp Covid-19 digơlan gam jŏ jòng, ồng Lê Ngọc Tuấn Chủ tịch Ủy ban Nhân dân càr Kon Tum sồr ală kơnhoàl, ƀòn dờng ngui bơta pràn geh lài, mơkung mhar blơi ală phan ngui phan bơna pal geh nàng kơ̆ kơl jăp anih ơm, anih sa, anih lơh broă bơh mpồl cau  dê tàm tiah lam lài tam dră mờ kòp Covid-19. Geh tŭ gam ai gơnoar Chủ tịch Ủy ban Nhân dân ală kơnhoàl, ƀòn dờng in gơnoar blơi prăp lài, yal tơnơ̆ mơya pal lơh geh cồng nha ngui mờ bè jŏ jòng gơtùi ngui wơl drơng ai broă lơh rơcăng sơndră kòp bơh tiah he dê in.

Cau mblàng Lơ Mu K’Yến