VOV4.K’ho- Tàm 2 ngai, 26 mờ 27/4, tàm ƀòn dờng Kon Tum, Mpồl tam klăc cau ùr càr Kon Tum bơyai lơh Bơto pơlam bơta gĭt wă mờ bơta chài ai cau ùr dơ̆ sơnrờp tơlik măt tĕ khà kuang bàng Hội đồng Nhân dân ală kấp tơngai lơh broă bơh nam 2021- 2026 in.

Tus bal bơsram ơdŭ bơto pơlam do, mờr 200 nă cau ùr dơ̆ sơnrờp tơlik măt tĕ khà kuang bàng Hội đồng Nhân dân ală kấp bơh càr Kon Tum dê, tơngai lơh broă bơh nam 2021- 2026 geh bơto tai bơta gĭt wă bè Quốc hội mờ Hội đồng Nhân dân; gĭt wă tai jơnau cih bơh adat boh lam dê bè hòi jà tĕ khà; gơnoar broă, kơnòl broă bơh Mpồl tam klăc cau ùr ală kấp dê tàm broă tus bal tĕ khà kuang bàng Quốc hội mờ Hội đồng Nhân dân; geh bơtê lơh bơta chài tìp măt tơm bơh bơr mờ gah mblàng yal jơnau, bơ̆t mòn rùp să is; tơnguh bơta chài sền, đơs, hơ jơnau lùp bơh cau tĕ khà dê.

Bơdìh hơ̆ tai, cau ùr dơ̆ sơnrờp tus bal tơlik măt tĕ khà kuang bàng Hội đồng Nhân dân ală kấp bơh càr dê, gam geh bàr pe nă kuang bàng tus bal uă dơ̆ tơngai lơh broă Quốc hội, Hội đồng Nhân dân càr dê yal bè bơta mờng chài ngan ngồn tàm broă iăt kơno jơnau đơs, bơta kơlôi sơnơng, jơnau kơ̆p kờñ bơh cau tĕ khà dê kung bè geh jơnau đơs tus bal tàm ală tơngume bơh dơ̆ pơrjum dê.

Cau mblàng Lơ Mu K’Yến