VOV4.K’ho- Càr Kon Tum pa geh sră nggal pơyua Tổng Công ty Ồs đèng tiah tàm gùl lơgar in dan sền swì, jal mhar lam bơcri priă lơh Trạm biến áp 110kV Đăk Glei mờ gùng che đèng 110kV Bờ Y- Đăk Glei jăt rơndăp ù tiah lơh.

Jăt Ủy ban Nhân dân càr Kon Tum đơs, broă bơcri priă lơh Trạm biến áp 110kV Đăk Glei mờ gùng che đèng 110kV Bờ Y- Đăk Glei là kờñ ngan mờ jal mhar ngan. Jơnau là tài geh Trạm biến áp mờ gùng che đèng do den hơ̆ sồng lơh geh bơta ƀươn ai broă tàm tơrbŏ ală hìu măy pờ tơlik ồs đèng tàm ù tiah kơnhoàl Đăk Glei; pơgồp bơnah bơtàu tơnguh lơh sa- mpồl bơtiàn bơh càr dê; lơh jăt di tŭ tơngai bơcri priă lơh ală hìu măy pờ tơlik ồs đèng mờ tơnguh uă bơta pin dờn lơh gơlik ồs đèng ai gùng che đèng dong jun đèng kơnhoàl Đăk Glei in.

Ồs đèng Kon Tum lơh dùl Trạm biến áp 110kV tàm ù tiah kơnhoàl Ngọc Hồi

Geh gĭt, Trạm biến áp 110kV Đăk Glei mờ gùng che đèng 110kV Bờ Y- Đăk Glei neh geh tàm Rơndăp ù tiah bơtàu tơnguh ồs đèng càr Kon Tum tơngai bơh nam 2016- 2025, mơya, tus tŭ do neh lơyài 3 nam pơndrờm mờ broă rơndăp lơh, Trạm kung gam ờ hềt geh Tổng Công ty Ồs đèng tiah tàm gùl lơgar bơcri priă lơh. Do gam là anih gơkòl bơh gùng che jun đèng hìu măy pờ tơlik ồs đèng mờ đèng càl dê tàm 2 kơnhoàl: Ngọc Hồi mờ Đăk Glei, càr Kon Tum jăt tiah nhàr lơgar mờ lơgar Lào.

Cau mblàng Lơ Mu K’Yến