VOV4.K’ho - Mho òr (08/11), tàm ƀòn dờng Kon Tum, Tỉnh ủy Kon Tum bơyai lơh tơn jơh mờ jào khà jờng dơ̆ pơrlòng Sră ƀăo bè bơ̆t bơtàu Đảng càr Kon Tum nam 2021.

                                             Jào khà A bè sơñio rùp ai mpồl cau cih jơnau geh khà in

Dơ̆ sơnrờp bơyai lơh, tơnơ̆ mờ mờr 4 nhai lam sồr, Mpồl bơyai lơh jào khà jờng Sră ƀăo bè bơ̆t bơtàu Đảng càr Kon Tum nam 2021 dờp geh 168 jơnau cih bơh 150 nă cau, mpồl cau tus pơrlòng bơh 17 tiah, anih lơh broă, mpồl lơh broă bal mờ mpồl ling tàm càr tus bal. Tàm khà ală jơnau cih tus pơrlòng geh 82 jơnau di mờ tơngu me geh ai mờ tus bal dar pơrlòng dŭt ndơl. Jơnau đơs bơh Mpồl bơyai pơlòng dê pà gŏ, ală jơnau cih neh tơrgùm tàm broă yal tơl ală bơta, ală broă lơh tàm broă bơ̆t bơtàu Đảng. Mpồl duh broă ai khà pơrlòng neh rơwah 13 jơnau cih geh pơnrơ ngan, jăk ngan yal mờ Mpồl bơyai lơh dơ̆ pơrlòng in dờp, jào khà C ai 6 jơnau cih; Khà B ai 4 jơnau cih; Khà A geh jào ai 3 jơnau cih. Ală jơnau cih geh khà pơn jờng sră ƀăo bè bơ̆t bơtàu Đảng càr Kon Tum nam 2021 geh pơyoa nàng tus bal dơ̆ pơrlòng sră ƀăo gùt lơgar bè bơ̆t bơtàu Đảng (khà pơrlòng mŭt mơ̆ biàng) dơ̆ 6 nam 2021.

Cau mblàng Ndong Brawl