VOV4.K’ho - Tàm ală nhai kàl prang do, mpồl lơh broă geh gơnoar, gơnoar atbồ ală tiah, mpồl cau tòm brê bal mờ làng bol tàm càr Kon Tum neh lơh ngan dơ̆ lĕ bàr kơnòl kuơ màng, hơ̆ là rơcang sơndră mờ ồs sa brê mờ atbồ sền gàr brê.

Bơh lài mờ satềp Tân Sửu tus tŭ do, mpồl lơh broă geh gơnoar, ală mpồl cau tòm brê, gơnoar atbồ ală tiah, mpồl bơtiàn, làng bol dờp atbồ sền gàr brê tàm càr Kon Tum sùm pal lơh ngan gàr ồs sa brê.

Bi A Cường, kis tàm ƀòn Đăk Kon, xã Đăk Rơ Nga, kơnhoàl Đăk Tô pà gĭt, làng bol dờp sền gàr 270 lồ brê bơh Công ty TNHH MTV lâm nghiệp Đăk Tô. Geh dờp priă sền gàr tiah kis brê, den pal geh kơnòl mờ brê: “Sền gàr ngai kung bè mang, kuơ màng là sền gàr brê ngòt ồs sa. Satềp kung sền gàr, ờ satềp kung sền gàr, sền gàr sùm jơh kàl prang ngòt ồs sa. Pah ngai he pal sùm lòt sền gròi. Jơh ală cau tàm ƀòn pal sền gàr jơh, tàm ala bal sền gàr”.

Tàm kơnhoàl tiah nhàr dà lơgar Ia H’ Drai, do là tiah geh 88 rơbô lồ brê mờ ù brê, ồng Nguyễn Quốc Tuấn, kuang atbồ mpồl sền gàr brê kơnhoàl do pà gĭt: “Trồ prang duh jŏ, ro kơnrañ, broă di gơlan ồs sa brê uă ngan. Bol añ kung neh ai ală tiah di gơlan gơtìp ồs sa uă nàng sồr geh sền gàr ngai kung bè mang. Ală cau tờm brê geh mpồl lơh broă tờm sền gàr brê. Mpồl hơ̆ geh sền gàr brê mờ tàm broă rơcang sơndră mờ ồs sa brê. Bơdìh hơ̆ tai, kơrnoăt pơgồp bal mờ ală mpồl lơh broă, mờ UBND xã, hơ̆ sồng ală mpồl ling geh pôs ling tàm do. Ală cau tờm brê pal lơh jăt di mờ gùng dà broă neh geh kĭ di jăt mờ broă lơh 4 tơn tàm tiah hơ̆ nàng rơcang lài tŭ gơtìp ồs sa brê gơbàn”.

Broă atbồ, sền gàr brê tàm càr Kon Tum tơngai do ờ mìng geh uă tàm tiah bơdìh brê. Tàm ală dơ̆ pơrjum bè broă brê bơnơm, geh dùl bơta geh lơh sùm geh tơlĭk loh, hơ̆ là lơh ngan uă bơh kuang bàng đơng lam càr kung bè gah lơh broă geh gơnoar tàm broă sền gàr bă brê tŭ do mờ tam wơl brê. Tàm pơrjum tơn jơh broă atbồ sền gàr brê, tơnguh bơtàu brê nam 2020; lơh jăt kơnòl nam 2021 mờ ală nam pơn jăt tai.

Bí thư Tỉnh ủy Kon Tum ồng Dương Văn Trang đơs tờm, pal ai kơnòl loh làng tus tơl cấp ủy, mpồl lơh broă, ală tiah, cau tòm brê mờ lơh glài nền nòn kuang bàng, cau geh đảng tìs tàm broă atbồ sền gàr brê: “Jơh ală cấp ủy pal sùm đơng lam, lam sồr broă atbồ sền gàr brê geh cồng nha rơlao mờ cau lam bồ lài cấp ủy đơng lam di lah gam ờ pràn uă den cau lam bồ cấp uỷ hơ̆ pal dờp kơnòl lài ngan. UBND càr, UBND kơnhoàl, UBND xã, ală cau tờm brê geh jào kơnòl atbồ sền gàr brê pal bơ̆t bơtàu rơndăp broă lơh, pal đơng lam atbồ sền gròi sùm. Di lah lời gơbàn tìs uă pal dờp kơnòl tềng đăp Tỉnh ủy. Lơh glài nền nòn kuang bàng, cau geh đảng tìs mờ kơrnoăt geh ai tŭ lơh jăt kơnòl tàm broă atbồ sền gàr brê”.

Càr Kon Tum gam lơh ngan uă tàm broă atbồ sền gàr mờr 549 rơbô lồ brê hòn is, rơlao 61 rơbô 600 lồ brê tam gam geh tŭ do mờ ai khà tàm 5 nam tus tam wơl geh 15 rơbô lồ brê. Kờñ lơh geh bơta do, dùl tàm ală kơnòl kuơ màng mờ càr Kon Tum ai là pơn jăt tai tơnguh uă ngan cồng nha bơh broă tơm priă sền gàr tiah kis brê tàm broă atbồ, sền gàr mờ tơnguh bơtàu brê.

Cau mblàng Ndong Brawl