VOV4.K’ho- Bàr ngai do, gơrềng bơh mìu càl rbŭt dờng sồ 6 dê neh lơh uă kơnhoàl ù tiah bơh càr Kon Tum dê geh mìu di mơ tus mìu dờng, yal lài tàm 24 jiơ tus tàm ù tiah càr Kon Tum dê pơn jăt tai geh mìu di mơ, mìu dờng, geh tiah mìu sơr dờng ngan. Kơnhoàl ù tiah ală kơnhoàl: Đăk Glei, Tu Mơ Rông, Kon Plông dà mìu digơlan geh bơh 100 tus 200 milimet pơhìn digơlan gơbàn dà cò, tơrlah ù là uă ngan. Tềng đăp bơta do, Chủ tịch Ủy ban Nhân dân càr Kon Tum neh geh sră pơyua mhar sồr lam lơh jăt broă lơh sơndră wơl mờ mìu dà tih, tơrlah ù.

Dùl anih ngơr bam dà tàm xã Đăk Pxi, kơnhoàl Đăk Hà, càr Kon Tum tàm dơ̆ mìu càl rbŭt dờng sồ 5

Jăt mờ hơ̆, Chủ tịch Ủy ban Nhân dân càr Kon Tum ồng Lê Ngọc Tuấn sồr Chủ tịch Ủy ban Nhân dân 10 kơnhoàl mờ ƀòn dờng bơh càr dê jăt sền niam bơta gơbàn mờ mìu càl rbŭt dờng sồ 6 dê mờ mìu dà tih; yal tơngĭt mờ tơngkah lài di tŭ ai ală mpồl cau, cau dùl nă să is mờ làng bol tàm ù tiah ƀòn lơgar in gĭt nàng sơndră wơl mờ trồ tiah lơh aniai; mơkung kờp sền, rơcăng lài gùng dà broă lơh sơndră wơl mờ mìu dờng, ngơr bam dà, dà cò, tơrlah ù, mìu kơnàs digơlan gơlik geh, kràñ cê jơh nùs ờ gŏ di lời gơbàn hoàc hươr tài bơh ờ rơcăng ngăc. Gơwèt mờ ală tiah ƀươn gơtìp gơrềng tơn bơh dà tih, dà cò mờ tơrlah ù....pal yal, tơngkah lài di tŭ ai làng bol in gĭt nàng rơcăng lài sơndră wơl.

Cau mblàng Lơ Mu K’Yến