VOV4.K’ho - Drim òr (05/07), Anih tờm gròi sền kòp tê jê să càr Lâm Đồng neh dờp rơlao 50 rơbô 350 nơm phan gròi sền xét nghiệm mhar virus Sars CoV-2 bơh dùl mpồl lơh sa kă bro dong kờl càr in.

Càr Lâm Đồng neh dờp rơlao 50 rơbô nơm phan gròi sền xét nghiệm mhar virus Sars CoV-2

Phan gròi sền xét nghiệm mhar virus Sars CoV-2 do geh Bộ Y tế ai tăc, geh bơta gơdờp mờ bơta di pal di jăt mờ khà geh ai bơh Mpồl lơh sơnơm dunia (WHO) geh Công ty Cổ phần rơndeh pơn diang năc Phương Trang blơi bơh lơgar Hàn Quốc cèng pà càr Lâm Đồng in drơng tàm broă sơndră mờ kòp Covid-19.

Jăt ồng Nguyễn Quốc Minh, Kuang atbồ Anih tờm sền gròi kòp tê jê să càr Lâm Đồng yal, broă dờp geh ală phan sền gròi xét nghiệm mhar do geh kuơ màng ngan, geh bơta kuơ mhar nàng drơng tàm broă sơndră mờ kòp Covid-19 tàm bơta tŭ do càr dê. Tŭ geh dờp, càr geh mhar tam pà ai ală mpồl lơh broă geh gơnoar tàm càr in nàng tơnguh cồng nha iă broă xét nghiệm, pơgồp bal tàm broă sơndră mờ kòp gơtờp.

Cau mblàng Ndong Brawl