VOV4.K’ho - Pơn jăt tai broă tìp mờ cau tĕ khà tơnơ̆ mờ pơrjum dơ̆ bàr, Quốc hội khoă 15, drim òr (16/11), ồng Phan Đình Trạc, Ủy viên Bộ Chính trị, Bí thư Đảng dà lơgar, Kuang atbồ Ban Nội chính Dà lơgar mờ ală kuang bàng ala măt Quốc hội khoă 15 càr Lâm Đồng geh dơ̆ tìp mờ cau tĕ khà tàm xã Lát, kơnhoàl Lạc Dương.

                       Càr Lâm Đồng gờñ bơsong ală jơnau dan bơh cau tĕ khà dê tơnơ̆ mờ dơ̆ tìp

Tàm dơ̆ tìp, ala măt Mpồl kuang bàng ala măt Quốc hội càr Lâm Đồng, Kuang atbồ Ban Nội chính Dà lơgar ồng Phan Đình Trạc dờp, đơs niam ală jơnau đơs di pal mờ mùl màl tàm rài kis bơh cau tĕ khà dê. Mblàng, lơh loh tai ờ uă broă gơrềng tus mờ broă dong kờl tơnơ̆ mờ tŭ klàs mờ rơƀah, nàng gàr niam broă klàs mờ rơƀah kơl jăp; broă dong kờl gơwèt mờ kuang bàng cấp xã, tàm hơ̆ uă ngan là kuang bàng lơh broă dờp bal kơnòl, thôn ƀòn. Mờ đơs, tơnơ̆ mờ dơ̆ tìp do, mpồl kuang bàng ala măt Quốc hội càr Lâm Đồng geh jào ală jơnau đơs, jơnau dan bơh làng bol tĕ khà tus mờ anih lơh broă geh gơnoar nàng bơsong mờ hơ di pal.

Cau mblàng Ndong Brawl