VOV4.K’ho - Poh lài, UBND càr Lâm Đồng neh geh dơ̆ lơh broă mờ Ủy ban cau lơgar Việt Nam kis hờ lơgar bơdìh tàm ƀòn dờng Hồ Ch1i Minh bal mờ ală cau lơh sa kă bro là cau lơgar Việt Nam kis hờ lơgar bơdìh, cau lơgar bơdìh, nàng tam pà bal ală jơnau tơngĭt, pơgồp bal mờ ală cau lơh sa kă bro bơcri priă, mpồl lơh sa kă bro, cau lơgar Việt Nam kis hờ lơgar bơdìh, nàng hòi jà lơh jăt ală rơndăp broă tàm càr do.

Càr Lâm Đồng neh yal tus mờ mpồl lơh broă bơh Ủy ban cau lơgar Việt Nam tàm lơgar bơdìh tàm ƀòn dờng Hồ Chí Minh bal mờ mpồl bơtiàn ală cau lơh sa kă bro, mpồl lơh sa kă bro, cau lơh sa kă bro cau lơgar Việt Nam tàm lơgar bơdìh bè bơta geh, bơta pràn càr Lâm Đồng dê; ai jơnau tơngĭt ală rơndăp broă lơh gam hòi jà bơcri priă lơh bè: Rơndăp broă lơh tiah nhơl chờ tơnao dà Prenn, Rơndăp broă lơh ƀòn drà Liên Khương-Prenn, Tiah nhơl chờ Dà lơgar tơnao dà Tuyền Lâm...

Jăt ồng Nguyễn Văn Châu, Phó kuang atbồ Sở Nông nghiệp mờ Phát triển Nông thôn càr Lâm Đồng yal, bơdìh mờ bơta pràn bè nhơl chờ hòi jà pah nam geh di pơgăp 7 tơlăk nă năc, càr Lâm Đồng gam là càr lam lài bè broă lơh sa suơn sre công nghệ cao. Den tàng, càr gam tơrgùm yal, hòi jà mờ hòi jà tai uă cau lơh sa kă bro bơcri priă tàm lơgar mờ lơgar bơdìh. “Pal đơs là broă lơh sa suơn sre càr Lâm Đồng tơnguh bơtàu ờ gơtùi ờ geh ală mpồl lơh sa kă bro, tàm hơ̆ uă ngan là ală mpồl lơh sa kă bro lơgar bơdìh nàng broă lơh sa suơn sre càr wèt tus drà kă bro mờ lơgar bơdìh, tơnguh uă khà geh kuơ gùt plai ù. Tàm hơ̆ uă ngan là ală phan tam geh bơta pràn bè ce, kơphe, tòm jơu ròng tu, bơkào mờ ròng kơnrồ dà toh... Di lah ală mpồl lơh sa kă bro jòi nàng gĭt nền nòn mờ geh bơcri priă den geh dong kờl càr Lâm Đồng tơnguh bơtàu”.

Tơnơ̆ mờ dơ̆ lơh broă mờ càr, mpồl lơh broă bơh Ủy ban cau lơgar Việt Nam tàm lơgar bơdìh tàm ƀòn dờng Hồ Chí Minh mờ ală mpồl lơh sa kă bro, cau bơcri priă kung neh lơh broă mờ kuang đơng lam kơnhoàl Lạc Dương, tus sền Tập đoàn Liên Minh, Công ty Nông sản Langbiang mờ sền ală rơndăp broă gam geh càr Lâm Đồng hòi jà bơcri priă lơh.

Ồng Steve Bùi, Kuang atbồ tập đoàn Delta E & C Japan pà gĭt, tŭ do ală cau bơcri priă, cau lơh sa kă bro, mpồl lơh sa kă bro cau lơgar Việt Nam tàm lơgar bơdìh ngai sơlơ kờñ rê ƀòn lơgar tờm bơcri priă lơh sa.

Den tàng, dơ̆ lòt jòi sền nàng gĭt mùl màl do geh là bơta tờm tơrbŏ bal, bơta kuơ màng pờ geh uă bơta niam ai ală mpồl lơh sa kă bro, cau lơh sa kă bro cau lơgar Việt Nam tàm lơgar bơdìh tus bal bơcri priă tàm càr. Ồng Steve Bùi đơs tờm: “Bol añ kung gŏ là càr Lâm Đồng là dùl tiah hòi jà bơcri priă pràn ngan, ală broă lơh geh ndrờm bal mờ loh làng, ai geh bơta niam uă ngan nàng ală mpồl lơh sa kă bro tàm lơgar mờ lơgar bơdìh bơcri priă tus mờ càr. Kơ̆p kờñ là bơh dơ̆ lòt jòi sền do bol añ geh broă lơh bal nền nòn tàm broă tam pà bal jơnau tơngĭt, mờ gơtùi rơwah kơnhoàl Lạc Dương là tiah bơcri priă sơnrờp ngan tàm càr Lâm Đồng do”.

Mờ broă lơh ngan bơh càr Lâm Đồng dê kờñ cèng geh ală broă lơh, nùs nhơm pin dờn ai ală cau bơcri priă, càr Lâm Đồng gam wèt tus broă lơh tơnguh pràn mhar bè broă lơh sa ai bơh bơta geh càr dê, lơh geh jơnau kờñ tơnguh bơtàu lơh sa mpồl bơtiàn kơl jăp.

Cau mblàng Ndong Brawl