VOV4.K’ho - Drim òr (23/04), tàm ƀòn dờng Dà Làc, UBND càr Lâm Đồng pơgồp bal mờ tập đoàn Novaland mờ ală mpồl lơh broă bal bơyai lơh lam sồr tam 50 tơlăk tờm chi tàm càr Lâm Đồng tơngai bơh nam 2021 tus 2025.

Đơs tàm dơ̆ sơn đờm lam sồr, ồng Trần Văn Hiệp, Phó Bí thư Tỉnh ủy, Chủ tịch UBND càr Lâm Đồng pà gĭt: Broă tam chi, sền gàr tiah kis mờ bơto kòn bơnus là dùl tàm ală kơnòl kuơ màng ngan tàm broă bơ̆t bơtàu, sền gàr mờ tơnguh bơtàu dà lơgar Việt Nam. Dờp bal broă bơceh lơh tam 1 tơmàn tờm chi bơh Thủ tướng Chính phủ lam sồr tàm Chỉ thị bè broă bơyai lơh “satềp tam chi” mờ tơnguh broă sền gàr, tơnguh bơtàu brê; càr Lâm Đồng neh lơh jăt broă lơh mờ tơlĭk rơndăp broă tam 50 tơlăk tờm chi tơngai bơh nam 2021 tus 2025 tàm càr.

Cau mblàng Ndong Brawl