VOV4.K’ho - Mho òr (06/08), Mpồl đơng lam rơcang sơndră mờ kòp Covid-19 càr Lâm Đồng neh tơlĭk kơrnoăt jal mhar lơh jăt broă tam cah ngài mpồl bơtiàn jăt Chỉ thị sồ 16 bơh Thủ tướng Chính phủ tàm 2 xã bơh ƀòn dờng Dà Làc dê.

      Broă lùp sền, jòi cau tìp rềp gam geh Mpồl lơh broă geh gơnoar tàm càr Lâm Đồng lơh jăt nền nòn

Jăt mờ hơ̆, bơh 7 jơ mang ngai òr (06/08) 2 xã Xuân Trường mờ Trạm Hành, ƀòn dờng Dà Làc neh sơn đờm lơh jăt broă tam cah ngài mpồl bơtiàn jăt Chỉ thị sồ 16 tus tàm tŭ geh jơnau yal pa. Kơrnoăt tam cah ngài mpồl bơtiàn tàm 2 xã rềp bal do geh ai tàm bơta kòp Covid-19 gơtìp kal ke. Mpồl đơng lam rơcang sơndră mờ kòp Covid-19 càr Lâm Đồng neh jào Chủ tịch UBND ƀòn dờng Dà Làc bơyai lơh jăt bal. Gơrềng tus mờ tiah gơtìp kòp pa, càr Lâm Đồng neh tơlĭk jơnau yal jal mhar nàng jòi cau geh măt tàm ală tiah di gơlan gơtìp uă. Tàm hơ̆, bơdìh mờ ală tiah gơwèt sơnah ƀòn 1, 2, 4, 9 mờ 10 tàm ƀòn dờng Dà Làc. Tŭ do broă jòi cau tìp rềp, wàng se nàng kơrian kòp gơtờp, pleh mờ gơtờp lĭk bơdìh mpồl bơtiàn gam geh ală mpồl lơh broă geh gơnoar lơh jăt nền nòn.

Cau mblàng Ndong Brawl