VOV4.K’ho – Tàm Tây Nguyên tu\ do geh 4 hìu bơsram đại học, 3 phân hiệu đại học bal mờ uă hìu bơsram cao đẳng mờ trung học ờs mờng, ai geh bơta [uơn nàng cau kơnòm să ală kòn cau in geh bơsram broă lơh mờ bơto bơtê jơnhua rlau.

Mờ jơnau kờ` ngai sơlơ uă bơh mpồl bơtìan dê bè bơta niam mpồl cau lơh broă, ală bơyô kơnòm să là kơnòm bơsram, cau bơsram dờng tàm Tây Nguyên neh nhap nhar, git  rơcang lài, bơceh pa tàm broă bơsram sră mờ pơlam tàp, lơh ngan tơnguh rlau tai bơta git wă, bơta chài nàng jòi broă lơh tu\ jơh bơsram:

Cau bơsram dờng Huỳnh Lê Thái Bão, ơdu\ Y Đa khoa K12A, Khoa Y Dược, hìu bơsram Đại học Tây Nguyên geh gơp bơyô ki ngàm ngan tài điểm bơsram 3,9 tàm khà 4 điểm wil tơl, mơkung là cau tờm bơh uă khà jờng bè: khà dùl jơnau git wă tàm dơ\ pơr lòng dà Mỹ dà lơgar Star Awads; khà dùl kơlôi sơnơng khoa học mờ khà dùl dơ\ pơr lòng Olympic dà Mỹ hìu bơsram nam 2017.

Thái Bão gam là cau lơh broă đoàn hội ngac ngar, nhap nhar, jơh nùs ngan, là Phó kuang atbồ 2 mpồl lơh broă dong kờl is bơh hìu bơsram Đại học Tây Nguyên dê. Bi kung là cau ala mat mìng dùl lơm tàm tiah tàm gùl lơgar mờ Tây Nguyên pơn ìơ să  ngan geh dờp khà jờng “cau bơsram dờng 5 niam” nam 2017 bơh Mpồl cau bơsram dờng dà lơgar Việt Nam dê jàu pà. Huỳnh Lê Thái Bão yal, bi tus bal uă dơ\ pơr lòng, uă broă lơh, uă srơh, ờ di là tài bơh khà jờng, mờ là kờ` sơlơ geh uă jơnau git wă mờ bơta chài, rơcang lài lơh broă tu\ jơh bơsram: “Bơta kuơ màng ngan rlau jơh ờ di là bơta pơn ìơ să tu\ he dờp khà jờng, mờ là jơh tu\ tơngai he neh lơh ngan, bơta hơ\ hơ\ sồng kuơ màng. A` lơh ngan lơh geh jat tơl khà broă lơh, bơh hơ\ a` tus bal ală mpồl dong cau bơsram dờng in geh bơta chài. Dilah bè cau bơsram dờng mìng bơsram lơm, den jơh gùt tơngai cau bơsram dờng dê mìng geh gùl jơnau sơnơng a` dê là  bè hơ\. Mờ a` lời gùl tu\ tơngai gam wơl nàng tus bal ală srơh, ờ mìng geh jơnau git wă, mờ gam geh bồ tơngoh kơlôi sơnơng bè mpồl bơtiàn, nàng gơtùi kis tàm mpồl bơtiàn”.

Ai gơwèt mờ Rahlan Koya, kòn cau Jarai, cau bơsram dờng ơdu\ Sư phạm Tiếng Anh K15, khoa Ngoại ngữ, hìu bơsram Đại học Tây Nguyên den sơnơng là, là dùl nă cau bơsram dờng tàm tơngai pa, mìng bơsram jak là ờ hềt tơl, mờ gam pal kơlôi rơcang is să tờm in ală jơnau git wă ngan ngồn, jòi git bơta geh ngan mờ ngan là pal pơlam tàp is bơta chài đơs dà lơgar ndai.

Là cau atbồ mpồl đơs dà Mỹ bơh hìu bơsram Đại học Tây Nguyên dê, Koya neh dong rề ơnàng broă lơh bơh mpồl dê jat broă lơh tơrbo\ bal ală cau bơsram dờng tàm Khoa Ngoại ngữ mờ ală khoa ndai, cribơyai mờng chài bal mờ gơp. Kơnờm bơh hơ\, broă geh bằng tiếng Anh B1 ờ gam là bơta kal ke mờ cau bơsram dờng tai. Rahlan Koya yal, dà Mỹ ờ kal ke, dilah he geh bơta pơlam tàp dipal: “Tàm ơdu\ den bol oh bơsram ală môn krơi is, ai rê tàm hìu den bol oh sùm lời tu\ tơngai bơh 1 tus 2 jiơ, 2 nă oh mi boh bơr mờ dà Mỹ lơm nàng tơnguh bơta chài đơs dà Mỹ”.

Là kòn put tàm hìu bơnhă geh tus 8 nă oh mi ndrờm gam lòt bơsram, mè bèp ndrờm lơh suơn sre. H’Tiên Byă, kòn cau Rơđê neh rơwah gah Văn thư lưu trữ, hìu bơsram Trung cấp Daklak nàng bơsram. H’Tiên pà git, tơngai bơsram trung cấp mìng 2 nam, den tàng broă bơsram is, pơlam tàp is pal sơlơ geh sền gròi. Ờ mìng bơsram, broă tus bal ală srơh broă lơh kung là bơta niam nàng pơlam tàp is să tờm: “Tus bal ală srơh do, dong bol oh in geh uă ngan bơta kuơ, geh tai tu\ tơngai nàng jòi git bơta geh ngan mờ geh uă tai ală bơta git gơp. Do kung là nam bơsram dut ndơl bloh, kung bè uă bơyô ndai tu\ jơh bơsram, den kung kơp kờ` tơnơ\ do geh broă lơh kơljap, lài ngan là gơtùi kơlôi rơcang is tàm rài kis he dê niam rlau, mờ 1 bơnah kung dong kờl hìu bơnhă in”.

Ơm tềng đap bơta geh ngan là bơta [uơn nàng jòi broă lơh ngai sơlơ kal ke, tơl nă cau bơsram dờng bơh ală [òn Tây Nguyên neh git wă is broă rơcang lài să tờm he in ờ mìng jơnau git wă bơh sră pơ àr, mờ gam bal bơh bơta geh ngan, lơh niam is să tờm bè tơl bơta.

Ală bơkàu bơh ală [òn dê ngai dờng pràn ngai pah ngai, hời rơ hời tơt plai lơ ngồt, gơ gơs là gar sơntìl, pơ gồp bơnah dong bơt bơtàu [òn lơgar bơtàu tơnguh rlau, gơ jat bal mờ gùng dà broă lơh mut gơ rờm bal bơh dà lơgar dê.

                                                                      Cau cih mờ yal tơnggit K’Duẩn