VOV4.K’ho- Mang ngai 02/7, Ủy ban Nhân dân càr Lâm Đồng bơyai lơh dơ̆ pơrjum pờ tơn tàm internet mờ anih lơh broă geh gơnoar, Ủy ban Nhân dân ală kơnhoàl, ƀòn dờng tàm càr dê nàng lam lơh kràñ cê jơh nùs ală broă lơh kơryan kòp bơtờp tơnơ̆ tŭ geh cau bơtờp kòp Covid-19 tàm càr. Cau kòp geh gĭt bơtờp mờ virus Sars CoV-2 bơh sơnrờp bơh càr Lâm Đồng dê là cau ùr (46 sơnam, ơm tàm kơnhoàl Dà Teh).

Lâm Đồng bơyai lơh pơrjum mhar tàm mang nàng lam lơh tơn ală broă lơh rơcăng sơndră kòp

Cau kòp bal mờ bơklau, ồng N.M.H, tăc plai chi tàm drà tờm Hóc Môn, ƀòn dờng Hồ Chí Minh bơh ngai 19/6 tus ngai 25/6. Ngai 26/6, ồng N.M.H pơndiang pơ ùr mờ rơndeh măy rê bơh Hóc Môn tus hờ hìu tàm thôn Phú Hoà, xã Mỹ Đức, kơnhoàl Dà Teh, càr Lâm Đồng. Tus 10 jiơ nggùl mang ngai 30/6, pơ ùr ồng dê gơtìp bơsiă mờ duh să dùl êt den tàng neh yal mờ cau lơh sơnơm in tàm Hìu sơnơm xã Mỹ Đức.

Gah lơh sơnơm tiah do neh sơrbac mhar tơn tus ai ơm yah ngài, ai mẫu xét nghiệm mờ gơ ai cồng nha bơtờp mờ virus Sars CoV-2. Jăt ồng Tống Giang Nam, Chủ tịch Ủy ban Nhân dân kơnhoàl Dà Teh dê yal, ùr bơklau ồng H tŭ bơh Hóc Môn rê geh lòt gan anih gròi sền kòp bơh kơnhoàl dê mơya yal mờ cau lơh sơnơm in ờ gŏ song dơ pă. Tơnơ̆ tŭ geh cồng nha xét nghiệm cau bơtờp kòp, kơnhoàl neh sơrbac mhar tus wàng se kơryan kòp thôn Phú Hoà mờ lam lơh sơrbac mhar ală broă lơh rơcăng sơndră kòp. Tŭ do, broă jòi cau ơm rềp, ai ơm yah ngài, ai mẫu xét nghiệm ală cau ơm rềp mờ cau kòp gam geh càr Lâm Đồng jơh nùs lơh.

Cau mblàng Lơ Mu K’Yến