VOV4.K’ho - Tàm 6 nhai bồ nam do, cau kơnòm să càr Dak Lak neh lơh rơlao 13 rơbô broă lơh, bơnah broă ơruh pơnu, pơgồp bal tàm broă bơ̆t bơtàu ƀòn lơgar pa, dong kờl ală tiah kal ke tàm càr.

Cau kơnòm să càr Dak Lak geh uă broă bơceh lơh tàm ală kơnòl broă lơh 6 nhai bồ nam

Mùl màl, tàm 6 nhai do, gùt càr neh tam pa mờ sền gàr mờr 41 rơbô tờm chi, lơh 47 anih pơrjum, nhơl chờ ai ơruh pơnu, kơnòm pa tào mờ kơnòm dềt tàm ală xã, sơnah ƀòn, thị trấn in. Lơh jăt mờr 200 broă lơh măng non mờ dong kờl rơlao 37 rơbô nă kơnòm dềt geh rài kis kal ke in. Lơh 5 broă lơh tơrlòng, dong kờl ơruh pơnu ờ pràn, dong kờl 53 rơndăp broă mŭt lơh broă, broă lơh ơruh pơnu mờ dong kờl càn priă mờr 48 tơmàn đong ai ơruh pơnu tơnguh bơtàu broă lơh sa.

Jăt jơnau đơs bơh Ban Thường vụ Tỉnh Đoàn Dak Lak yal, tàm 6 nhai do, bŭ lah gơtìp aniai bơh kòp Covid-19 lơh ală broă lơh gơtìp tàm bơta kal ke ngan, uă broă lơh pal ơm ing mờ sơbì. Mơya, ală broă lơh gam geh lơh jăt ndrờm bal, uă đoàn tàm ală tiah neh geh broă rơcang lài mờ lơh broă ndrờm bal tàm broă lơh jăt ală khà broă, mờ geh lơh gơs kơnòl mờ lơh ndrờm ală broă pơgồp bal mpồl lơh broă nàng sơndră mờ kòp gơtờp.

Cau mblàng Ndong Brawl