VOV4.K’ho- Tơnơ̆ 21 ngai sơm tàm Hìu sơnơm kòp jòr bơsiă gơlik mhàm mờ kòp klơm soh càr Dak Lak mờ 3 dơ̆ xét nghiệm pa do geh cồng nha ờ bơtờp mờ virus Sars CoV-2, drim ngai 22/6, cau kòp Covid-19 sồ 7186 neh rê bơh hìu sơnơm. Cau kòp Covid-19 sồ 7186 ơm tàm xã Cư Mốt, kơnhoàl Ea H’leo, càr Dak Lak. Cau kòp do geh git gŏ bơtờp mờ virus Sars CoV-2 tàm ngai 30/5. Do là cau kòp gơ rềng tus mpồl cau kòp bơh gah bơto jơnau yàng Phục Hưng tàm ƀòn dờng Hồ Chí Minh.

Gơ rềng tus cau kòp do, Ủy ban Nhân dân kơnhoàl Ea H’leo neh wàng se 3 thôn mờ 9 anih bal mờ 2 rbô 500 nă làng bol. Lơh jat broă ơm yah ngài mpồl bơtiàn jat jơnau sồr sồ 15 bơh Thủ tướng Chính phủ dê gơ wèt tus mờ thị trấn Ea Drăng, xã Ea Wy, xã Cư Mốt mờ 36 rbô nă cau. Tơnơ̆ tŭ rê bơh hìu sơnơm, cau kòp geh jun rê tàm hìu nàng pơn jat tai sền gròi pràn kơldang să jan tàm hìu jat di jơnau sồr bơh Bộ Y tế dê.

Cau mblàng K’Duẩn