VOV4.K’ho – Nam do neh rlau 80 sơnam mơya ồng Y Yơh Kbuôr ơm tàm ƀòn dờng Buôn Ma Thuột, càr Dak Lak kung gam jơh nùs ngan mờ broă lơh bơh ƀòn lơgar dê. Geh pin dờn pồ lơh kra ƀòn, Kuang atbồ Mpồl lơh broă mặt trận, Chủ tịch Mpồl cau kra ƀòn tàm uă nam do, ồng sùm jơh nùs mờ broă lơh. Ală ngai do, ồng kung là cau geh jơng jơh nùs ngan bal mờ ală mpồl cau ndai lòt tus tơl hìu mblàng yal, hòi jà làng bol lơh jat broă rơcang sơndră kòp mờ dong kờl kes priă rơcang sơndră kòp tàm ƀòn lơgar.

Bơh tŭ gơlik geh broă bơtờp kòp Covid-19 dơ̆ 4 tàm Dak Lak, pah tŭ trồ mang, ồng Y Yơh Kbuôr, ơm tàm ƀòn Kmrơng Prong A, xã Ea Tu, ƀòn dờng Buôn Ma Thuột bal mờ cau atbồ ală mpồl liên gia lòt tus tơl hìu tàm ƀòn nàng sồr tơl nă cau lơh jat ală jơnau sồr rơcang sơndră kòp, tơngkah ală hìu bơnhă geh cau tờm pa rê bơh ngài pal yal bè tiah lòt rê mờ tam cah is tàm hìu. Mò H’Ó Kbuôr, dùl nă cau ơm tàm ƀòn Kmrơng Prong A, xã Ea Tu, ƀòn dờng Buôn Ma Thuột pà git, bơh jơnau yal tàm sră ƀău, rơdiô mờ bơh ală dơ̆ boh bơr mờ ồng Y Yơh, hìu bơnhă mò dê neh geh jơnau git wă bè rơcang sơndră kòp niam rlau. Mờ bulah rài kis ờ hềt di là pas sơm, mơya phan dùl êt ai nùs nhơm den uă, mò kung tă pơgồp tàm kes priă rơcang sơndră kòp Covid-19 bơh Chính phủ dê: “Añ kung sùm geh iat mblàng yal ală tơngume bè broă gơlik geh bơh kòp bơtờp mờ broă rơcang sơndră kòp tàm hìu bơnhă den he kung lơh jat jơh nùs ngan. Hơ̆ sồng tŭ geh ală dơ̆ hòi jà tă pơgồp den he kung tă pơgồp, geh dùl êt den tă pơgồp dùl êt, geh uă den tă pơgồp uă, gơ jat tàm bơta pràn mùl geh he dê”.

Ồng Y Yơh jơh nùs lòt mblàng yal, hòi jà làng bol

Ƀòn Kmrơng Prong A tŭ do geh mờr 550 hìu bơnhă bal mờ 2 rbô 300 nă cau, uă ngan là cau Rơđê ơm kis. Kra ƀòn lơh krơh lài, mpồl atbồ is lơh broă jơh nùs, den tàng ală srơh bơt bơtàu lơh sa, sền gàr rài kis niam chài geh gal ngan làng bol lơh jat. Bè hơ̆ den tàng tus tŭ do, ƀòn kung gam prap gàr geh uă bòr cing kuơmàng, uă drap yăng yau kuơmàng, niam chài bơka ồi kòn cau, phan soh ờs mờng, dà mbòr, hìu jòng. Pah tŭ tàm ƀòn geh bơta tam lah tam lơh, tơl nă cau nggui wơl bal mờ gơp, mblàng git tìs di, ờ huan ngan pal kờñ geh bơta ƀư tê bơh adat boh lam dê. Ồng Y Yơh chờ hờp ngan tŭ sền gŏ, bulah kong gơ rềng bơh bơta tam gơl rài kis tiah drà dê, mơya ƀòn Kmrơng Prong A kung gam là ƀòn cau Rơđê cèng bềng bơta niam chài: “Tơl nă cau, ơruh pơnu tàm ƀòn neh geh bơta ring bal mờ lơh jat niam den tàng bol hi chờ hờp ngan. Dơ̆ 2 là bè broă sền gàr bơhiàn ơm kis, broă lơh yàng ờs mờng bơh jŏ, lơh yàng halà hòi dan pràn kơldang să jan, lơh yàng dà mbòr den bol hi, cau atbồ ƀòn, ală mpồl cau, mpồl duh broă cau kra ƀòn ndrờm bal mờ gơp pơgồp bal, tơngkah tơl nă cau tàm ƀòn bal mờ gơp sền gàr”.

Bơh tŭ geh gùng dà bơh Ủy ban Nhân dân ƀòn dờng Buôn Ma Thuột mờ xã Ea Tu dê bè dong kờl priă lơh gùng, ƀòn Kmrơng Prong A neh bơyai lơh pơrjum jơh gùt làng bol mờ tơl mpồl liên gia nàng cribơyai, ring bal khà priă tă pơgồp, broă lam lơh, sền sơ wì, gròi sền. Gơ wèt mờ ală hìu bơnhă ờ hềt git loh, ồng Y Yơh neh bal mờ kấp ủy, mpồl atbồ is, ală mpồl cau tus tàm hìu nàng mblàng yal, hòi jà, mblàng loh bơta kuơ bơh broă lơh gùng dê, mờkung ai ală tŭ tus bal ală broă lơh chờ tàm ƀòn nàng đơs tai làng bol in wă. Mờ jơnau đơs jơh nùs, rềp mềr, ồng Y Yơh neh hòi jà, lơh gơlik bơta ring bal bơh làng bol dê. Bơdìh mờ bơnah tă pơgồp bal là 200 rbô đông tàm 1 hìu bơnhă, tơl hìu bơnhă gam tă pơgồp tai 40 rbô đông ai dùl thơl ù mat gùng. Rlau mờ hơ̆, làng bol gam ntrờn is pơng gàr, kơl tờm chi nàng rề ơnàng gùng bơh 6 tus 8 thơk jat tơl khà broă lơh ƀòn lơgar pa. Kơnờm bơh hơ̆, mìng tơnơ̆ dùl tŭ tơngai lơyah, ală gơl gùng lòt tàm ƀòn ndrờm neh geh tuh bê tông halà lă mờ cài.

Ồng Y Yơh tam pà mờng chài mblàng yal rơcang sơndră kòp bơtờp

Ồng Bùi Văn Hượng, kuang bàng lơh broă niam chài xã Ea Tu, ƀòn dờng Buôn Ma Thuột pà git, mờ bơta jơh nùs, geh kơnòl, git wă bơhiàn ơm kis bơh jŏ tiah do dê, ồng Y Yơh neh gơ gơs là anih kơldìng nùs nhơm bơh làng bol ƀòn Kmrơng Prong A dê. Bơta jơh nùs bơh ồng dê neh pơgồp bơnah dong ƀòn gàr kơ̆ khà jờng ƀòn niam chài tàm uă nam do mờ lơh gơs ală broă lơh ƀòn lơgar pa. Mờ tơngai rlau 30 nam lơh broă mặt trận, lơh Chủ tịch Mpồl duh broă cau kra ƀòn bơh xã dê tàm uă nam, bulah tàm gơnoar broă lơi, ồng Y Yơh kung jơh nùs pơgồp bal mờ ală kuang bàng tàm ƀòn lơgar, mpồl cau tàm ƀòn nàng lơh gơs niam broă lơh, tơnguh gơnoar broă he dê tam klac bal, bơtòm tơrgùm làng bol, lơh krơh lài tàm ală broă lơh. Să tờm ồng Y Yơh kung là krơh niam pơn rơ jak bè sền gàr niam chài, ròng siam oh kòn gơ lòng sồr. Ồng sùm đơs gơ jat bal mờ lơh den tàng geh làng bol ki ngàm, pin dờn. Kuơmàng, tŭ lơh Chủ tịch mpồl duh broă cau kra ƀòn, ồng neh dong tơnguh gơnoar broă bơh tơl nă cau tàm Mpồl duh broă dê gơ wèt tus mờ làng bol tàm ală ƀòn: “Mpồl duh broă cau kra ƀòn kung geh tơngkah ală cau kra ƀòn, mblàng yal hòi jà ală cau kra ƀòn ndai lam lơh niam broă gàr oh kòn he dê ờ lơh tìs mờ lơh jat niam broă rơcang sơndră kòp Covid-19. Mpồl duh broă cau kra ƀòn kung tus bal ală broă lơh prap gàr niam chài bơh jơi bơtiàn kòn cau he dê, bơto bơtê oh kòn lơh jat niam kơnòl broă, ờ lơh tìs adat boh lam”.

Rềp mềr mờ làng bol mờ git bơta sơnơng làng bol dê, rlau 30 nam do, ồng Y Yơh Kbuôr neh gơ gơs là anih tờm tam klac bơh ƀòn Kmrơng Prong A dê đơs is mờ bơh ală ƀòn làng bol kòn cau tàm xã Ea Tu đơs bal. Mờ broă lơh là lòt tơl gơl gùng, teh mpồng tơl hìu, bơto tơngkah rơlĕ rơlùn, geh gùng geh dà, ồng Y Yơh ngai sơlơ geh làng bol pin dờn, iat, đơm jat. Kơnờm bơh hơ̆ neh pơgồp bơnah uă ngan tàm broă hòi jà bơt bơtàu rài kis pa tàm ƀòn ơm kis, sơlơ tơrbŏ kơ̆ nùs nhơm tam klac bal đah làng bol ală jơi bơtiàn kòn cau tàm ƀòn.

Cau mblàng K’Duẩn