VOV4.K’ho - Ngai òr (08/07), Mpồl đơng lam ling sền gàr tiah nhàr dà lơgar càr Dak Nông bơyai lơh pơrjum tơn jơh ing broă nhàr dà lơgar 6 nhai bồ nam 2021.

                               Pơrjum mpồl đơng lam ling sền gàr tiah nhàr dà lơgar càr Dak Nông

Jăt mpồl đơng lam ling sền gàr tiah nhàr dà lơgar càr Dak Nông yal, nggùl bồ nam do, bơta lơngăp lơngai dà lơgar tàm gơl gùng nhàr dà lơgar càr dê geh ring niam; broă kơrian kă bro blơ̆ blăc, mŭt, lĭk ờ di mờ adăt boh lam bal mờ tam dră mờ kòp Covid-19 geh cồng nha uă.

Bal mờ broă sền gàr niam bơta lơngăp lơngai gơnoar tờm ù tiah nhàr dà lơgar, cau ling sền gàr tiah nhàr dà lơgar càr Dak Nông gam dong kờl làng bol kis tàm tiah nhàr dà lơgar 1 rơbô 250 ngai lơh broă, dong kờl làng bol lơh mờr 6 kơi sồ gùng lòt tàm ƀòn, lơh niam wơl 6 nơm hìu ai ală hìu nhă geh rài kis kal ke in. Mpồl đơng lam ling sền gàr tiah nhàr dà lơgar càr Dak Nông pà gĭt, tàm tơngai tus mpồl ling sền gàr tiah nhàr dà lơgar pơn jăt tai tơnguh broă lam sồr làng bol tàm tiah nhàr dà lơgar ờ dong kờl, ờ pồn cau mŭt, lĭk tàm lơgar ờ di mờ adăt boh lam. Mờ ală mpồl ling chồl pràn rơlao tai broă lơh gùt làng bol yal yă ală cau mŭt tàm lơgar Việt Nam ờ di mờ adăt boh lam.

Cau mblàng Ndong Brawl