VOV4.K’ho- Sơnam dờng, mờ là cau ling sồt să, mơya ồng Hoàng Biên Thùy, ơm tàm xã Hòa Xuân, ƀòn dờng Buôn Ma Thuột, càr Dak Lak kung gam lơh ngan tus bal broă lơh mpồl bơtiàn. Tềng đap bơta kòp Covid-19 gơlik geh kal ke, mờ gơnoar broă là Chủ tịch mpồl cau ling yau xã dê, ồng Thùy neh geh uă broă lơh geh kuơ ngan tàm broă sơm bat tê bal rcang sơndră kòp.

Bơh tŭ kòp Covid-19 kòp dơ̆ 4 bơtờp tàm ală tiah, bulah mìng ơm tàm hìu lơm mơya bơh jơnau yal tơngĭt bal tàm mpồl Zalo bơh Mpồl cau ling yau xã dê, ồng Nguyễn Văn Bằng, ơm tàm thôn 1, xã Hòa Xuân, ƀòn dờng Buôn Ma Thuột, càr Dak Lak kung gĭt loh tơl làm bè bơta gơlik geh bơh kòp dê. Ồng Bằng pà gĭt, mpồl Zalo do bơh ồng Hoàng Biên Thùy, Chủ tịch Mpồl cau ling yau xã Hòa Xuân crơng gơs mờ sùm yal tơngĭt jơnau tàm do. Ồng Nguyễn Văn Bằng đơs:

 Mblàng yal bè rcang sơndră kòp bơh Zalo den bi Thùy lơh jak ngan den bi hơ̆ neh bơto pơlam wơl nền cê ngan, bơh jơnau yal, Chỉ thị den hơ̆ sồng bơta gơlik geh kòp tàm tơl tơngai ndrờm ngan ngồn  ngan nàng he in gĭt mơ mờ di tŭ mblàng yal ai làng bol in.

Ồng Hoàng Biên Thùy (ơm dơ̆ 2 đah kiau) gam bơto pơlam cau tàm mpồl in ngui Zalo nàng pờ sền gĭt jơnau yal bè kòp

Ờ mìng yal tơngĭt jơnau yal mờ bơto pơlam làng bol ngui Zalo nàng sền gĭt jơnau yal bè kòp dê, ồng Hoàng Biên Thùy gam tus tơn tàm hìu làng bol nàng mblàng yal. Là cau tàm mpồl đơng lam rcang sơndră kòp bơh xã dê, ồng Thùy geh jàu drơng broă thôn 1 mờ thôn 4. Pah tŭ geh jơnau yal pa, ồng bal mờ mpồl sơndră kòp bơh thôn dê tus bơto pơlam ai làng bol in. Bi Nguyễn Thị Sơn, ơm tàm thôn 1, xã Hòa Xuân, ƀòn dờng Buôn Ma Thuột yal:

 An gŏ wa Thùy jơh nùs ngan tŭ tus ală tiah nàng mblàng yal broă rcang sơndră kòp Covid-19 đơs bal, bơto pơlam tơl làm nàng làng bol in gĭt geh bè lơi là broă ngui Zalo. Ưn ngài ngan wa Thùy, cau neh dờng sơnam ngan bloh, neh ơm rlô lơh broă mơya kung gam jơh nùs ngan mờ làng bol tàm tiah do sơl.

Hòa Xuân là xã geh ù tiah làng bol ơm kis uă, geh gơl gùng tàm ală kơnhoàl tàm tơrbŏ mờ gùng dờng 14 mờ ală kơnhoàl Buôn Đôn, Ea Sup. Tàm xã kung geh rlau 300 nă cau lòt lơh broă tàm ală càr Đồng Nai, Bình Dương mờ ƀòn dờng Hồ Chí Minh. Gĭt loh ală bơta do den mờ gơnoar broă là cau tàm mpồl đơng lam rcang sơndră kòp Covid-19 bơh xã dê, ồng Thùy sùm lơh ngan cribơyai bal mờ Kuang đơng lam bồ broă lơh di pal nàng mblàng yal, bơto pơlam làng bol in. Mpồl đơng lam rcang sơndră kòp Covid-19 xã Hoà Xuân dê kung sùm geh mat tàm ală thôn, ƀòn tàm xã nàng mblàng yal, bơto pơlam làng bol lơh jat niam broă rcang sơndră kòp. Kờp sền, jat sền khà cau rê bơh ală càr, ƀòn dờng ndai mờ cau rê bơh tiah kòp rê wơl tàm xã; dong kờl làng bol crăp ngui Bluezone. Bal mờ hơ̆, ồng Thùy gam rcang lài crơng gơs mpồl Zalo mờ bơto pơlam ală cau tàm mpồl mờ làng bol in ngui nàng ƀuơn ai broă mblàng yal rcang sơndră kòp.

  Ồng Hoàng Biên Thùy đơs, să tờm là cau ling, neh lơh ală gơnoar broă tàm anih lơh broă atbồ, kuang đơng lam bồ den ồng kung gĭt dùl ết sơl bè công nghệ thông tin. Geh bơta pin dờn tàm pà broă lơh bơh Đảng ủy mờ Mpồl kấp hơđang dê; să tờm ồng bulah sơnam neh dờng mơya kung gam kờñ tă pơgồp dà kơl hề he dê tàm broă lơh bal.  Ồng Hoàng Biên Thùy đơs:

Mờ nùs nhơm geh kơnòl bơh cau ling dê tŭ rê wơl mờ rài kis bè ờs kung pal tơngŏ bơta khin cha bơh cau ling Wa Hồ dê sơl, bulah là dùl nă cau ling sồt să, dùl nă cau ling yau mơya kơnòl broă bơh Đảng dê jàu den pal lơh sir. Tàm dơ̆ bơtờp kòp do añ sùm lòt mờ oh mi ală mpồl mblàng yal, hòi jà nàng làng bol in gĭt rcang sơndră kòp Covid-19 bè lơi ai gơ in di pal. Bal mờ broă mblàng yal mờ jơnau đơs halà pờ ală phan yal tơngĭt jơnau làng bol dê, ngui điện thoại ngăc ngar nàng khi in gĭt loh broă rcang sơndră kòp, hơ̆ là kơnòl broă bơh he dê bal mờ mpồl bơtiàn.

Ồng Hoàng Biên Thùy kung lơh ngan hòi jà cau tàm mpồl tus bal bơt bơtàu ƀòn lơgar pa, bơtàu tơnguh lơh sa hìu bơnhă

Là cau ling sồt să khà 4/4 mờ neh mờr 70 sơnam mơya tàm uă nam do, ồng Thùy sùm lơh ngan tus bal tàm ală broă lơh tàm xã dê. Jat ồng Nguyễn Đức Thuận, Bí thư Đảng ủy xã Hòa Xuân, ƀòn dờng Buôn Ma Thuột đơs, bơh 2 tơngai lơh broă lơh Chủ tịch Mpồl cau ling yau, ồng Thùy neh lơh ngan hòi jà cau tàm mpồl tus bal tàm ală  srơh bơh tiah do dê lam lơh. Uă cau tàm mpồl cau ling yau neh lơh ngan bơt bơtàu ƀòn lơgar pa, pà is ù lơh gùng lòt, bơtàu tơnguh lơh sa hìu bơnhă mờ dong kờl ală cau tàm mpồl kal ke.

Ngan là, bơh tŭ kòp Covid-19 bơtờp kòp tàm nam 2020 tus tŭ do, bulah xã Hòa Xuân ờ hềt geh cau kòp mơya broă lơh rcang sơndră kòp tàm tiah do dê sùm geh lơh ngan. Mờ gơnoar broă là Chủ tịch Mpồl cau ling yau, ồng Thùy gam blàng yal, hòi jà jơh ală kuang bàng mpồl ling yau tàm ală chi hội tus bal tàm mpồl gròi sền mpồl bơtiàn tàm thôn, ƀòn nàng mblàng yal, gròi sền cau lik mut tàm thôn, ƀòn, lơh jat niam ală broă lơh rcang sơndră kòp. Ồng Nguyễn Đức Thuận đơs:

Đảng ủy jờng rơ ngan, ồng Thùy lơh Chủ tịch Mpồl cau ling yau 2 tơngai lơh broă, bulah tŭ do sơnam neh mờr 70 mơya mờ nùs nhơm jơh nùs ồng sùm lòt lài tàm ală broă lơh, ngan là broă lơh ngan bơtàu tơnguh mpồl, bơt bơtàu Đảng, bơt bơtàu gơnoar atbồ. Ngan là pa do ngan là xã crơng gơs mpồl đơng lam rcang sơndră kòp den tàm hơ̆ ồng Hoàng Biên Thùy tus bal tàm broă lơh rcang sơndră kòp Covid-19 den kung tus bal mblàng yal jơh nùs ngan sơl.

Sơnam dờng, să jan den lơbơn lơño, mơya mờ nùs nhơm mờ kơnòl bơh cau ling dê tŭ rê wơl mờ rài kis bè ờs, cau ling yau Hoàng Biên Thùy neh geh uă tă pơgồp gơwèt mờ tiah do dê. Tềng đap bơta gơlik geh kal ke bơh kòp dê, nùs nhơm “sơndră kòp bè tam dră mờ bol sò tơm” gam geh lơh ngan den broă lơh bơh ồng dê sơlơ gơ gơs ngan ngồn, geh kuơ, pơgồp bơnah bal mờ gơnoar atbồ mờ làng bol rcang sơndră, kơryan kòp Covid-19.

Cau cih H’Xíu H’Môc- Cau mblàng K’Hạnh