VOV4.K’ho- Pơrjum Hiệp hội broă lơh lơh broă mpồl bơtiàn ASEAN dơ̆ 10 mờ tơngume “Cau lơh broă mpồl bơtiàn là anih tờm bơh broă lơh bơtàu tơnguh wơl tơnơ̆ kòp Covid-19” geh bơyai lơh drim ngai 21/9 jat broă lơh pờ tơlik tơn tàm tineternet. Do là broă lơh bơh Bộ Lao động Thương binh mờ Xã hội lơgar he dê – mờ gơnoar broă là Chủ tịch Hịêp hội broă lơh lơh broă mpồl bơtiàn ASEAN tơngai bơh nam 2020-2021 bơyai lơh. Pơrjum geh bơta tus bal tàm internet bơh ală kuang bàng, kuang bàng drơng broă ală anih lơh broă lơh broă bal ờs mờng bơh ASEAN dê.

Mờ gơnoar broă là Chủ tịch Hiệp hội broă lơh lơh broă mpồl bơtiàn ASEAN tơngai bơh nam 2020-2021, Việt Nam neh pơgồp bal niam ngan mờ ală lơgar tàm ASEAN, Kes priă kơnòm dềt Liên hợp quốc mờ ală lơgar lơh broă bal geh gơrềng nàng kờñ tơnguh broă bơt bơtàu mờ lơh sir Broă lơh lơh jat Jơnau yal bơr bal Hà Nội bè Sơlơ tơnguh lơh broă mpồl bơtiàn wèt tus Mpồl bơtiàn ASEAN pơgồp bal mờ rcang lài gơ dờp nàng yal tàm dơ̆ Pơrjum kuang bàng kấp dờng màng ASEAN dơ̆ 38 cih dờp tàm nhai 10 tus. Tàm dơ̆ pơrjum, ala mat ală anih lơh broă ờs mờng bơh ASEAN mờ ală lơgar lơh broă bal, neh tam pà bal mờ cribơyai bal jơnau sồr lơh jat bè gơnoar broă bơh gah lơh broă mpồl bơtiàn dê tàm broă lơh rcang sơndră mờ bơtàu tơnguh wơl tơnơ̆ kòp Covid-19, tàm hơ̆ tơrgùm tàm gah sền gròi gah lơh sơnơm mờ gàr tơl niam rài kis mpồl bơtiàn.

Tàm tơngume bơh dơ̆ pơrjum dê neh bơyai lơh dơ̆ Kir sơn rai 10 nam Hiệp hội broă lơh lơh broă mpồl bơtiàn ASEAN (2011-2021).

Cau mblàng K’Hạnh