VOV4.K’ho- Bàr pe nhai do, làng bol tam phan kềng 2 gah dà dờng Dà Nhim, gơl hòr gan xã Lạc Xuân, kơnhoàl Đơn Dương, càr Lâm Đồng bòl glar kal ke ngan tài bơh dà tuh gơtìp ƀơ̆ ƀơl ngan. Neh geh uă bă ù lơh biăp, tam tờm phan sa gơtìp ờ geh tơnhàu tài bơh dà tuh gơtìp dà ƀơ̆, sơkal ir tài bơh broă lơh tơnhàu bràs lơh aniai.

Bulah neh rơcăng wil tơl ală bơta pal geh nàng tam kàl biăp sơlăt pa, mơya rlau 10 ngai do, hìu bơnhă bi Nguyễn Thị Lành, ơm tàm thôn Diom B, xã Lạc Xuân, kơnhoàl Đơn Dương kung gam ờ hềt kờñ tam sơl, ờ khin tam tài bơh ngòt gơtìp hoàc hươr. Gơbàn jơnau do là tài bơh dà tuh ai bơh dà dờng Nhim neh gơtìp sơkal ngan, geh tŭ dà kơ̆t ù bŏ lơm tài bơh broă lơh tơnhàu bràs uă ngan bơh dùl mpồl lơh sa kă bro dê tàm dơlam hiòng dà dờng tơn. Jăt bi Lành yal, broă tam biăp sa ală bơta, ngan là biăp sơvê, biăp sơlăt, biăp cải thảo...gơ sồr dà tuh pal là dà sàng goh, dilah tuh dà ƀơ̆, dà ờ niam mờ geh uă ù bŏ den sền bè là roh gời, hoàc hươr lơh sa uă ngan. Bi Lành, yal: Rơcăng tam kàl do là 1 lồ 3 sàu sơlăt tơn, mơya jơnau gơbàn dà sơkal sùm bè do den biăp geh gơtìp ờ niam. Tam sơlăt di pơgăp bơh 2 tus 3 poh là sơnđờm gơ pồt nha rao, dilah tuh dà do biăp in den biăp gơtìp jù ngan, bol añ gơtìp hoàc hươr jơh tai.

Tiah tơnhàu bràs tàm dà dờng Dà Nhim bơh Công ty TNHH Lê Văn Oai Lâm Đồng dê

Broă lơh tơnhàu bràs lơh dà tàm dà dờng Nhim sơkal ngan, ƀơ̆ ƀơl gơrềng uă ngan tus broă lơh sa bơh uă làng bol tàm tiah do dê. Jăt mò Phan Thị Cấp ơm tàm thôn La Bouye A, xã Lạc Xuân yal, bulah dà ờ sàng goh mơya làng bol kung pal tuh ai tờm chi tam in tài bơh ờ geh dà ndai nàng ala dà do. Neh geh uă bă ù tam biăp, tam phan sa gơtìp aniai jơh, tờm chi tam croăñ ờ dờng tài bơh dà sơkal ir. Dilah bơta do pơn jăt tai jŏ jòng den geh lơh uă cau lơh broă sa gơ ơm tàm rài kis kal ke, tàm hơ̆ geh hìu bơnhă mò dê. Mò Phan Thị Cấp đơs: Tam biăp bắp sú mờ tuh dà sơkal den tàm dơlam gơbàn jù ngan, bòl bè hơ̆ gơ ì. Đơs bal là dà tàm dà dờng Dà Nhim do den mìng geh dà ai bơh dà dờng Dà Nhim lơm. Kàl ne den gơtìp dà tih ngơr bam jơh, ai kàl do tơrgùm lơh sa den dà gơlik wơl ờ gơtùi tuh tờm phan tam in.                  

Dà Nhim là dà dờng hòr gan ù tiah uă xã mờ thị trấn bơh kơnhoàl Đơn Dương mờ dùl bơnah ù tiah kơnhoàl Đức Trọng dê, là anih ai dà tuh tờm ngan drơng lơh broă sa sươn sre ai tam tam biăp tờm ngan bơh càr Lâm Đồng dê in. Bơta pal đơs là, tơngai do là kàl prang, dà tàm dà dờng dà Nhim ờ huan uă mơya mpồl tơnhàu bràs là Công ty TNHH Lê Văn Oai Lâm Đồng geh anih lơh broă tàm kơnhoàl Đơn Dương neh ai 2 nơm ơhò dờng ngan tus nàng jồp bràs jun hờ àr. Dà bŏ ờ gŏ lơh niam wơl, dà gơkờn geh mpồl lơh sa kă bro do tuh tơn tàm hiòng dà dờng, lơh dà dờng sơlơ sơkal ir ngan, mờ dà kơ̆ bŏ bil lơm.   

Ờ mìng ƀơ̆ ƀơl dà lơm, uă àr kềng gah dà dờng neh geh tềl tơngŏ pơhìn tơrlah ù     

Kơno yal, Công ty TNHH Lê Văn Oai Lâm Đồng geh càr Lâm Đồng ai sră ai gơnoar tơnhàu bràs tàm do tàm bă ù ơnàng rlau 11 lồ, hơ̆ là jăt kềng gah dùl gơl dà dờng Dà Nhim jòng pơgăp mờr 6 kơi sồ. Tơngai sơnđờm tơnhàu là ngai 30/11/2020 mờ tơngai ai tơnhàu jŏ jòng tus 14 nam 5 nhai. Ồng Hoàng Công Hiếu, Kuang ătbồ Cơldŭ lơh broă Phan kuơ geh is mờ Tiah ơm kis kơnhoàl Đơn Dương pà gĭt, broă công ty do tơnhàu bràs lơh gơlik ƀơ̆ ƀơl dà, gơrềng tus broă lơh sa sươn sre bơh cau lơh broă sa dê là geh ngan. Tàm tơngai tus, dilah bơta do ờ geh đah mpồl lơh sa kă bro bơsong niam den geh sồr pal ơm lơh broă tơnhàu bràs tàm do. Ồng Hoàng Công Hiếu, đơs: Tàm ală tŭ tơnhàu bràs den pal gàr niam dà ai làng bol in drơng tàm broă lơh sa sươn sre. Mơya, tus tơngai do, bơh jơnau yal wơl bơh làng bol dê den dà tuh kung gam ờ geh lơh niam sơl. Den tàng bè hơ̆, mờr tus, kơnhoàl geh bal mờ Cơldŭ lơh broă Phan kuơ geh is mờ Tiah ơm kis geh lòt sền, sền swì wơl tơnơ̆ hơ̆ den sồr cau tờm mpồl lơh sa kă bro pal bơsong jơh broă ờ niam do. Dilah ờ geh bơsong den geh tơn lời lơh broă tơnhàu bràs bơh ồng Lê Văn Oai dê.

Làng bol ờ suk ơm ngan tài bơh dà dờng gơtìp ƀơ̆ ƀơl, sơkal ir, gơrềng uă ngan tus broă lơh sa sươn sre

Ờ mìng dà gơtìp ƀơ̆ ƀơl ngan, broă tơnhàu bràs bơh Công ty TNHH Lê Văn Oai Lâm Đồng dê neh lơh uă gơl àr dà dờng Dà Nhim dê gơtìp gơmù ù, rơdàng, pơhìn gơtìp tơrlah ù uă tàm kàl mìu dà tih dà cò là uă ngan. Bơdìh hơ̆ tai, tàm ală tŭ lơh broă tơnhàu bràs, công ty do gam khăt gơboh nùs is bơ̆t bơkang kơryan hiòng dà hòr tàm dà dờng, mơkung ờ hềt lơh jăt tơl jơnau hơ pơrgon jăt jơnau sồr bơh kơrnoat boh lam dê, tàm hơ̆ geh broă ờ lơh jăt crăp ơn anih kơng tàm anih jun phan kuơ tàm ù tơnhàu geh lik bơh tiah do, ờ crăp ơn măy camera tàm tiah ơn bràs nàng prăp gàr jơnau yal tơngĭt...

                                                                                                                                                             Cau cih Hà Quang Sáng- Cau mblàng Lơ Mu K’Yến