VOV4.K’ho- Tơngai lài, khà priă tiêu geh tềl tơnggŏ gơguh wơl tŭ gơguh tus 70 rbô đông tàm dùl kĭ mờ gàr sùm tàm khà do. Bè hơ̆ den tàng, uă cau lơh broă sa tàm Gia Lai neh mờ gam sơn đờm tam pa tờm tiêu. Bulah bè hơ̆, làng bol pal kơrhia, pleh gơbàn wơl bơta tac yòm den bơcri uă, tam ur ar, tŭ gơmù khà priă den roh jơh, ờ jai tơm dồs.

Jat jơnau đơs bơh cau jak chài dê bè tờm tiêu, tŭ do, broă tam pa bă tiêu tàm Gia Lai là dipal. Tài tơnơ̆ uă nam ơm ờ tam tiêu tàm ală bă ù tiêu gơtìp chơt tài bơtờp kòp nàng tam chi lơyah ngai, uă bă ù neh niam wơl, jơnau gơ drơm kòp tàm ù kung neh gơmù. Bal mờ hơ̆, broă khà priă tiêu gam kơ̆ kơljap tàm drà kă bro lơh gơlik priă cồng niam cau lơh broă sa in. Bulah bè hơ̆, cau lơh broă sa pal lơh jat ală jơnau pơlam bơh anih lơh broă mờng chài dê nàng pleh gơbàn wơl bơta neh geh tŭ gơlik geh lài do.

Cau mblàng K’Duẩn