VOV4.K’ho- Tơnơ̆ tŭ Chính phủ geh Kơrnoăt 128 bè gơdờp ờdo ờdă, ngăc ngar mờ kơryan geh cồng nha kòp Covid-19, uă mpồl lơh sa kă bro tàm ală càr, ƀòn dờng tiah đah jum dà lơgar lơh broă wơl den cau lơh broă ală càr Tây Nguyên kung sơnđờm wơl lòt wơl tai nàng lơh broă. Tàm gùng rơndeh dờng 14, ală ngai rềp ndo geh uă mpồl rơndeh tàm jăt jơng gơ̆p lòt jăt đah gùng tus hờ ală càr tiah đah jum dà lơgar, cau lơh broă lòt lơh broă wơl bal mờ uă bơta gơn kơnờm tŭ bàr pe bơta kơlôi rơcăng, ờ suk neh geh mpồl lơh sa kă bro hơ bơsong.

Tơnơ̆ rlau dùl nhai rê wơl hờ hìu nàng pleh mờ kòp bơtờp tàm kơnhoàl Chư Pưh, càr Gia Lai, bi Nguyễn Minh Khánh mờ mpồl cau bơyô mờr 20 nă tàm jà gơ̆p wơl lòt wơl hờ càr Bình Dương nàng lơh broă. Tàm tơngai ơm pleh kòp, bi Khánh neh geh cĭt dùl ding vaccine rơcăng sơndră kòp Covid-19 mờ lài mờ tŭ lòt gùng bi neh lơh xét nghiệm mhar ờ bơtờp mờ kòp Covid-19, ƀươn lòt gan ală anih gròi sền kòp bơh 2 càr Dăk Lăk mờ Dăk Nông dê. Bi Khánh lơh broă tàm dùl công ty mờng yờ dăp phan bơna, priă nhai kờp bal lài do là 6 tơlak 500 rbô đong. Tŭ wơl lòt lơh broă wơl, công ty hơ tơnguh priă nhai tus 8 tơlak 500 rbô đong, den tàng bi rơcăng lòt lơh mờ bơta kơlôi rơcăng kòp kung bơtờp kung gơmù đau dùl êt tŭ công ty đơs nền geh rơndăp tăp sèng nàng cô nhân in lơh broă 3 dùl bă tiah tơn, sền gàr ờdo ờdă. Bi Khánh, đơs: Añ yờ dăp phan bơna, ƀañ kèu dà lơngồt. Mŭt tàm hơ̆ geh lơh 3 dùl bă tiah tơn, priă nhai 8 tơlak 500 rbô đong. He ơm dùl anih tơn den ờ gŏ geh bơta lơi pal kơlôi rơcăng kòp, ơm tàm hìu prăp phan ih, ờ gŏ ai lik bơdìh, ờ gŏ geh ơm rềp mờ cau lơi.

Kung tàm gùng lòt bal mờ mpồl mờr 30 nă cau, geh gơ̆p bơyô, oh mi jơi nòi tus wơl hờ càr Đồng Nai lơh broă, bi Y Trinh Buôn Yă, ơm tàm thị xã Buôn Hồ, càr Dăk Lăk pà gĭt, 3 nhai rê pleh kòp tìp uă ngan kal ke tài bơh ờ geh broă lơh. Bơtuah ngan là công ty khŏ zĕp tiah bi Y Trinh lơh broă neh dong kờl công nhân in 1 tơlak 500 rbô đong dùl nhai tàm tŭ ơm rlô broă ing. Do kung là bơta gơn kơnờm nàng ală công nhân bè bi wơl lòt lơh broă wơl tơn tŭ Chính phủ geh Kơrnoăt 128 bè gơdờp ờdo ờdă, ngăc ngar mờ kơryan geh cồng nha kòp Covid-19, mpồl lơh sa kă bro pờ mpồng lơh broă wơl. Kơlôi rơcăng uă ngan rlau jơh bơh bi Y Trinh dê là ờ hềt geh gĭt vaccine mơya mpồl lơh sa kă bro neh hơ geh gờñ bơsong ai jơh ală công nhân in. Bi Y Trinh, yal: Añ lơh công nhân zĕp khŏ, tơndùh phan. Công ty hòi lòt lơh wơl den pal cĭt vaccine den hơ̆ sồng mŭt lơh. Công ty kung dong kờl mờ neh hơ rao.

Tŭ kòp bơtờp gơbàn kal ke ngan, mpồl lơh sa kă bro til mpồng ờ lơh broă, cau lơh broă tàm Tây Nguyên ur ar dô rê bơh ală càr tiah đah jum dà lơgar nàng pleh kòp. Mơya tơnơ̆ tŭ Chính phủ geh Kơrnoăt bè gơdờp ờdo ờdă, ngăc ngar, kơryan geh cồng nha kòp Covid-19, uă mpồl lơh sa kă bro lơh broă wơl den cau lơh broă tàm ală càr Tây Nguyên kung rơcăng wơl lòt lơh broă wơl sơl. Mờ mùl màl, pah ngai neh geh mờr 1 rbô nă cau lơh broă lòt tus ală càr tiah đah jum dà lơgar. Do là tềl tơngŏ pal chờ ngan nàng bơtàu tơnguh wơl lơh sa tàm tiah lơh sa pràn ngan tiah đah jum dà lơgar dê tơnơ̆ tơngai gơbàn kòp dờng.

Cau cih Công Bắc- Cau mblàng Lơ Mu K’Yến