VOV4.K’ho- Tơnơ̆ tŭ Chính phủ geh Kơrnoat sồ 128 bè gơdờp ờdo ờdă, ngac ngar mờ kơryan geh cồng nha kòp Covid-19, uă mpồl lơh sa kă bro tàm ală càr tiah đah jum dà lơgar lơh broă wơl den cau lơh broă tàm ală càr Tây Nguyên kung sơnđờm wơl lơh broă wơl. Tàm gùng rơndeh dờng 14, ală ngai rềp ndo, geh uă mpồl rơndeh măy tàm jăt gơ̆p lòt tus ală càr tiah đah jum dà lơgar, cau lơh broă wơl lòt lơh broă wơl bal mờ uă bơta gơn kơnờm tŭ bàr pe bơta kơlôi rơcăng, rơngòt neh geh mpồl lơh sa kă bro hơ bơsong.

Cau lơh broă lòt jăt mpồl tus wơl lơh broă tàm ală càr, ƀòn dờng tiah đah jum dà lơgar

Tŭ kòp gơbàn kal ke, mpồl lơh sa kă bro ờ lơh broă, cau lơh broă tàm Tây Nguyên ur ar dô rê bơh ală càr tiah đah jum dà lơgar nàng pleh kòp. Mơya, tơnơ̆ tŭ Chính phủ geh Kơrnoat bè gơdờp ờdo ờdă, ngac ngar mờ kơryan geh cồng nha kòp Covid-19, uă mpồl lơh sa kă bro lơh broă wơl den cau lơh broă tàm ală càr Tây Nguyên kung rơcăng lòt lơh broă wơl. Mờ bơta geh ngan là pah ngai neh geh mờr 1 rbô nă cau lơh broă lòt tus ală càr ƀòn dờng tiah đah jum dà lơgar. Do là tềl tơngŏ chờ hờp ngan nàng bơtàu tơnguh wơl lơh sa tàm tiah lơh sa tờm tiah đah jum dà lơgar tơnơ̆ ngai gơbàn kòp dờng.

Cau mblàng Lơ Mu K’Yến