VOV4.K’ho- Tàm 09 nhai do, kờp bal pah nhai geh rlau 10 rbô mpồl lơh sa kă bro lik bơh drà kă bro, tàm tŭ khà mpồl lơh sa kă bro crơng gơs pa mờ khà priă cih tàm sră bơcri lơh kung gơmù sơl pơndrờm bal dùl tŭ mờ nam lài. Tềng đăp ală kal ke bơh mpồl lơh sa kă bro, Thủ tướng Chính phủ neh geh nùs nhơm đơng lam loh làng là ơm kis bal ờdo ờdă mờ kòp Covid-19 nàng bơtàu tơnguh lơh sa.

 Jăt Tổng cục Tơrgùm kờp yal, tài gơrềng bơh kòp Covid-19, ală anih lơh gơlik phan gơtìp gơkòl, 09 nhai do geh rlau 90 rbô mpồl lơh sa kă bro lơh sa gơtìp hoàc hươr, gơguh 15,3% pơndrờm bal dùl tŭ mờ nam lài (kờp bal pah nhai geh rlau 10 rbô mpồl lơh sa kă bro lik bơdìh drà kă bro). Kung tàm 09 nhai do sơl, mìng geh pơgăp 85 rbô mpồl lơh sa kă bro crơng gơs pa, gơmù 13,6% pơndrờm bal dùl tŭ mờ nam lài. Bal mờ hơ̆, khà priă cih tàm sră nggal bơcri lơh kung gơmù sơl pơndrờm bal dùl tŭ mờ nam lài. Ồng Phạm Đình Thúy- Kuang ătbồ Vụ Tơrgùm kờp Lơh sa mờ măy mok mờ bơ̆t bơtàu gơwèt Tổng cục Tơrgùm kờp, Bộ Kế hoạch mờ Đầu tư, đơs là: Covid gơbàn bơh bồ nam 2020, tus tŭ do neh mờr 02 nam. Bơta pràn kong bơh mpồl lơh sa kă bro dê neh mờr jơh ờ jai kong tai. Ờ hềt nam lơi mờ khà crơng gơs pa lơyah rlau pơndrờm mờ mpồl lơh sa kă bro pal ơm lơh sa, tơn jơh lơh broă bè nam do ờ.

Ồng Nguyễn Quang Huân- Kuang bàng Quốc hội khoá XV, Phó Kuang ătbồ Mpồl cau lơh sa kă bro làng bol Việt Nam dê den pà gĭt: Tơngai pa do pal ơm yah ngài jŏ jòng tàm uă tiah, ngan là ƀòn dờng Hồ Chí Minh, Hà Nội, ală càr geh tiah geh kòp den tàng khà mpồl lơh sa kă bro lik bơdìh drà kă bro là jơnau wă wờng geh mờ pal dờp tài bơh dùl tŭ bal sồr lơh geh 2 jơnau kờñ hơ̆ là lơh sa kă bro mơkung rơcăng sơndră kòp là bòl glar kal ke ngan, den tàng bol he pal ai lài ai ală bơta lơi kờñ lơh lài in. Bơtuah ngan, tus tŭ do, Thủ tướng neh geh nùs nhơm đơng lam loh làng là ơm kis bal ờdo ờdă mờ kòp Covid-19 nàng bơtàu tơnguh lơh sa, añ sơning là bơta geh lơh niam wơl tàm ală nhai lồi nam.

Sền gròi bal broă lơh lơi nàng mpồl lơh sa kă bro neh mờ gam kong jai geh gơtùi gàr sùm broă lơh sa kă bro; broă lơh lơi nàng ală mpồl lơh sa kă bro gam kơ̆ kơl jăp lơh sa kă bro gơtùi mhar bơtàu tơnguh wơl tàm tơngai tus taih? Mò Phí Thị Hương Nga- Phó Kuang ătbồ Vụ Tơrgùm kờp Lơh sa mờ măy mok mờ bơ̆t bơtàu, Tổng cục Thống kê, Bộ Kế hoạch mờ Đầu tư geh jơnau dan: Khà mpồl lơh sa kă bro ơm lơh broă 09 nhai nam do dê mìng là mpồl lơh sa kă bro geh priă lơh sa ờ tus 5 tơmàn đong. Broă dong kờl tơrmù priă tă bơcri lơh sa ai ală mpồl lơh sa kă bro in là kờñ ngan gĭt lơh, pơnyơu bè ai gơnoar mpồl lơh sa kă bro in xét nghiệm is kòp Covid-19 mờ ai tơlik ală broă rơndăp lơh lơh sa kă bro dipal, mơkung gam lơh jăt sơl ală jơnau sồr bè rơcăng sơndră kòp Covid-19 mờ ală tiah pal lời tĕ ală sră pơ àr ndai lơh kal ke ai mpồl lơh sa kă bro in.

Pơndŭt dơ̆ pơrjum Chính phủ ờs mờng nhai 09 pa do, Thủ tướng Chính phủ ồng Phạm Minh Chính đơs sùm bàr pe tơngume kuơmàng, tàm hơ̆ sền gròi ngan tus broă lơh bơh mpồl lơh sa kă bro dê. Mùl màl là lam lơh tơn ală broă lơh lơh wơl broă lơh tàm ală tiah lơh sa mờ măy mok, tiah lơh sa, tiah lơh sa mờ măy mok, tiah lơh gơlik phan tăc mờ lơgar ndai. Tă bơsong ală kal ke dong mpồl lơh sa kă bro gàr sră dan blơi phan, gàr sùm anih lơh gơlik phan, lơh ngan lơh sa ai kàl lơh sa uă in, ngan là cau năc blơi uă phan tàm châu Âu, Mỹ, tiah đah tô măt tơngai lik châu Á. Bơyai lơh jòi, ngui niam tŭ tơngai niam bơh ală Hiệp định kă bro khăt gơboh neh kĭ hơ. Kờp dŭ, yal lài tăc blơi phan bơna tàm dơ̆ lồi nam nàng ờ gơtìp ờ tơl phan tăc tàm drà.

Cau cih VOV1- Cau mblàng Lơ Mu K’Yến