VOV4.K’ho- Mờr 10 nam đềt mềr mờ broă bơto sră tàm hìu bơsram Chính trị càr Dak Lak, kung là kàr hơ̆ tơngai mờ bi Phạm Văn Dương đềt mềr mờ broă Đoàn mờ broă lơh ơruh pơnu tàm hìu bơsram do. Ờ mìng geh uă cồng nha tàm broă bơto, bi Dương gam là kuang bàng đoàn ñhăp ñhar, jơh nùs, geh uă broă pơgồp bal tàm broă lơh đoàn dê.

Ală ngai do gam là tơngai geh uă broă lơh nhai ơruh pơnu dê, bŭ lah ờ ru mờ broă bơto tàm Khoa Xây dựng Đảng, Hìu bơsram Chính trị càr Dak Lak, Thạc sĩ Phạm Văn Dương gam jơh nùs tus bal mờ ală broă lơh đoàn.

                               Bi Phạm Văn Dương ai tơngai tŭ ru mŭt tàm Thư viện nàng sền sră

Bi Phạm Văn Dương yal, broă bơto, kơlôi sơnơng khoa học geh uă ngan tơngai, den tàng bi mìng gơtùi ai ală ngai lồi poh nàng tus bal mờ broă lơh đoàn. Mơya, tài gơboh kờñ den tàng bơh tŭ gam là cau bơsram dờng, bi Dương neh tus bal uă ngan broă lơh Đoàn dê bè: broă lơh nam pa nùs nhơm dong kờl, broă lơh kàl rơlô bơkang tơlir, ai mhàm dong kờl is, còp mờ pà phan làng bol kis tàm tiah kal ke.

Bơh nam 2013, tŭ dờp bơto tàm hìu bơsram Chính trị, bal mờ ală broă bơto, bi pơn jăt tai tus bal mờ broă lơh đoàn mờ geh pồ mŭt lơh broă tàm Ban chấp hành, at gơnoar broă phó Bí thư Đoàn hìu bơsram, mờ là phó Bí thư Đoàn mpồl ală anih lơh broă bal mờ mpồl lơh sa kă bro càr Dak Lak.

Tàm gơnoar broă lơi, bi Dương kung sùm kơlôi sơnơng mờ bơceh lơh gơlĭk broă lơh di pal nàng chồl pràn broă lơh đoàn dê. “Bơh broă lơh đoàn kung neh dong kờl añ dờng pràn uă ngan. Bơh tŭ tus bơto tàm hìu bơsram tus tŭ do den să tờm añ kung neh geh uă ngan broă lơh, bè tŭ gơtìp kòp Covid-19 gpơtìp tàm càr den să tờm añ kung neh bơ̆t bơtàu rơndăp broă lơh mờ lam sồr ală mpồl đoàn lơh sơgơn sơndră mờ dà gơpar mờ hòi jà ală bơta pràn bơh ală mpồl lơh sa kă bro nàng dong kờl ai tiah lài ngan tam dră mờ kòp gơtờp in, tàm hơ̆ uă ngan là ală y, bác sĩ”.

Ờ mìng bơceh lơh tàm broă lơh jăt ală broă lơh Đoàn dê, bi Phạm Văn Dương kung geh uă broă bơceh lơh tàm broă lơh jăt kơnòl bơto, tus bal kơlôi sơnơng khoa học.

          Bi Phạm Văn Dương dờp sră jờng rơ bơh Tổng Liên đoàn Lao động Việt Nam

Là cau pơgru gam kơnòm să (bi deh nam 1989) mơya bơh tŭ geh dờp bơto tàm hìu bơsram tus tŭ do, bi Dương neh geh 4 tơngu me jơnau kơlôi sơnơng khoa học ală cấp, 2 jơnau cri bơyai dunia mờ rơlao 30 jơnau cih geh lĭp tàm ală sră ƀăo. Uă bồ tơngoh kơlôi sơnơng bơh bi dê neh geh ngui tàm mùl màl mờ cèng geh cồng nha.

Pa do ngan, bi Phạm Văn Dương gam tus bal mờ dơ̆ lam sồr pơrlòng bơ̆t bơtàu mờ tơnguh bơtàu càr Dak Lak pas gơs, jăk chài mờ tơngu me Rơndăp săp sèng tơnguh bờtau broă lơh sa mờ măi mŏk lơh gơs phan pơgồp bal mờ broă gàr niam bơta lơngăp lơngai dà lơgar. Jơnau bơceh lơh do neh geh càr dờp mờ ai mŭt tàm gùng dà broă lơh tàm tơngai tus.

Tàm jơnau bơceh lơh den broă geh ai là pal lơh bè lơi tàm rơndăp broă tơnguh bơtàu broă lơh sa mờ măi mŏk lơh gơs phan pal geh ai tơngu me dơ̆ lĕ bal, nàng tơnguh bơta kuơ phan geh lơh, mơya geh pơgồp bal mờ broă gàr niam bơta lơngăp lơngai dà lơgar.broă lơh jăt nrơndăp broă ù tiah, jào brê den pal geh jơnau bơto sồr ngui bal. Mờ bă ù tàm ờ uă càr tiah nhàr dà lơgar tŭ do den di lah bơsong geh broă bè bơtơ̆t rơbòng dà mờ jòi rồ ƀồm mền den gơtùi ai rơndăp broă ù tiah mờ bơsong ù tam phan, ai ù lơh ƀòn ơm kis, mpồl lơh broă dờng tàm tiah nhàr dà lơgar do nàng ai geh ală ƀòn ơm kis jăt gah nhàr dà lơgar mờ kung geh kuơ bè dùl tiah gàr nàng sền gàr dà lơgar.

Ñhăp ñhar broă lơh đoàn, jăk chài tàm broă bơto sră, ală nam do, bi Phạm Văn Dương neh geh dờp uă jơnau jờng rơ bơh càr mờ dà lơgar. Nam 2017, bi Dương neh geh dờp Kuang atbồ hìu bơsram Học viện Chính trị Dà lơgar Hồ Chí Minh pà sră dờp cau pơgru bơto jăk gùt lơgar. Nam 2019, bi dờp sră jờng rơ bơh Tổng Liên đoàn Lao động Việt Nam bè cồng nha jăk chài tàm broă lơh jăk, lơh broă bơceh lơh. Bi kung là 1 tàm 2 nă kuang bàng đoàn geh pơnyờ să ngan dờp geh khà pơn jờng Lý Tự Trọng nam 2021.

Đơs bè cau pơgru kơnòm să Phạm Văn Dương, Tiến sĩ Đỗ Văn Dương, Phó kuang atbồ hìu bơsram Chính trị càr Dak Lak đơs: “Bi Phạm Văn Dương là dùl tàm ală kuang bàng đoàn kơnòm să, nhăp nhar, jơh nùs. Bol añ kung geh dờp, đơs niam bi neh geh uă broă lơh pơgồp bal tàm gah kơlôi sơnơng, bơto lơh broă tàm hìu bơsram, Đoàn hìu bơsram kung là bơh đoàn mpồl ală cấp dờng rơlao. Nam lơi bi Phạm Văn Dương kung ndrờm tus bal niam tŭ geh ală broă lơh đoàn bơh cấp dờng rơlao kung bè ală mpồl lơh broă, anih lơh broă lam sồr pơrjum den ndrờm tus bal lơm”.

Bi Phạm Văn Dương yal, bi gơlơh pơy ờ să ngan tŭ geh dờp broă kờ` bal mờ ai tơl bơta niam bơh kuang đơng lam hìu bơsram, broă dong kờl bơh ală bơyô, cau pơgru bal. Hơ̆ geh là ală bơta pràn nàng bi pơn jăt tơnguh ală bơta pràn, bơta ngăc ngar să tờm, tus bal mờ lơh broă uă rơlao tai tàm ală broă lơh đoàn kung bè lơh ngan rơlao tai nàng lơh jăk broă bơto sră.

Cau cih H’ Xíu-Cau mblàng Ndong Brawl