VOV4.K’ho- Mò Rơ Châm H’Déo (kòn cau Jarai), lài do là Chủ tịch Uỷ ban Mặt trận dà lơgar càr Gia Lai dê chờ hờp ngan geh jàu kơnòl broă sac rơwah 9 tờm chi kơnia bơh Tây Nguyên cèng tus tàm càr lơgar Hà Nội nàng tam tàm tiah Gơlăng ƀồc Chủ tịch Hồ Chí Minh dê. Ngai lơh chờ tàm tờm chi kềng gah gơlăng ƀồc Bác Hồ dê là dùl broă lơh dờng màng mờ ngoh rngăc gơwèt mờ làng bol jơi bơtiàn kòn cau Gia Lai dê. Mpồl Kuang bàng mờr 50 nă bơh mò Rơ Châm H'Déo lơh Kuang atbồ mpồl tàm hơ̆ geh ală kra ƀòn, cau geh pin dờn jat yàng pơn rơ jak, cau ala mat tơl ală jơi bơtiàn kòn cau gam kis tàm ù tiah càr Gia Lai dê. Tàm nùs nhơm yŭ rơyùm ngoh rơngăc, mò Rơ Châm H'Déo neh ala mat làng bol ală jơi bơtiàn kòn cau Gia Lai dê đơs jơnau đơs tàm nùs nhơm gĭt ưn ngài uă ngan gơwèt mờ dà kơl hề dờng bè trồ tiah, dà lềng bơh Đảng, Bác Hồ dê. Rlau 10 nam do, ală tờm Kơnia hời rơ hời dờng, ntê gơ lì jơm tàm gah Gơlang ƀồc Bác Hồ dê, là rùp hin pơrya bơh nùs nhơm kơ̆ dơn, dòn song, dùl nùs dùl tồr bơh làng bol Tây Nguyên dê dùl nùs bal jat Bác Hồ, jat Đảng dê. Ngai 2/9, tơngkah kir sơnrai 76 nam Sơntờm dà lơgar, mò Rơ Châm H’Déo tơngŏ bơta ngoh rơngăc.

Ngai 2/9/1945, Bác Hồ sền sră lơngap lơngai is crơng gơs dà lơgar Việt Nam. Bơh ngai hơ̆ tus tŭ do neh rlau 76 nam bloh. Kơnờm geh bơta lơngap lơngai is den tŭ do là làng bol kòn cau Jrai, Bahnar hơ̆ sồng geh rài kis lơngap lơngai. Tơnơ̆ nam 1945 tus nam 1946 geh Pơrjum dờng ală jơi bơtiàn kòn cau, tơrgùm jơh ală jơi bơtiàn tàm dà lơgar Việt Nam, sơm bat tê bal tam lơh mờ bol sò tơm Tây ai geh bơta lơngap lơngai is jơi bơtiàn dê. Tàm càr Gia Lai tơn, làng bol kòn cau Jrai, Bahnar, bè Bác Hồ neh đơs là: “Cau yoan halà cau Thổ, Mường, Mán, Jrai, Bahnar, Rơđê, Sơdàng ndrờm là oh mi pròc mhàm lơm, pal tam klăc bal, dong kờl bal bơta pràn tam lơh mờ sền gàr dà lơgar là kơnòl bal. Den tàng bè hơ̆, tơl nă làng bol tàm dà lơgar do là oh mị jơh lơm, ờ lời cau lơi ơm wơl bơh ngkời, ờ geh cau lơi gơtìp lời tĕ, cau kra, cau kuĕt kơl te, cau rƀah kal ke ndrờm dong mờ bơt bơtàu dà lơgar.

Cau mblàng K’Hạnh