VOV4.K’ho- Bơh iat mờ sền dơ̆ lùp mờ hơ jơnau lùp, ngan là bơnah hơ jơnau lùp bơh Thủ tướng Chính phủ ồng Phạm Minh Chính dê tàm drim ngai 12/11, cau tĕ khà Trần Mạnh Việt, Chủ tịch Mpồl cau dờng sơnam ơm tàm sơnah ƀòn 3, ƀòn dờng Dà Làc, càr Lâm Đồng neh ai tơnggŏ bơta iang nùs he dê bè ală broă lơh bơtàu tơnguh wơl mờ bơtàu tơnguh lơh sa- mpồl bơtiàn, sơr lèt gan kòp dờng Covid-19 mờ Thủ tướng bal mờ ală kuang bàng Chính phủ neh hơ mờ đơs tus. Bulah bè hơ̆, cau tĕ khà Trần Mạnh Việt kơp kờñ ală broă lơh do pal geh lam lơh dùl bă mùl màl rlau, lơh bè lơi nàng gơ in dipal mờ bơta krơi is bơh tơl tiah dê.

Cau tĕ khà Nguyễn Huỳnh, kuang bàng neh jơh sơnam lơh broă, hìu tàm mpồl 7, sơnah ƀòn Thắng Lợi, ƀòn dờng Kon Tum, càr Kon Tum đơs: tơngu me broă lùp mờ hơ jơnau lùp bơh ală kuang bàng Quốc hội ndrờm là ală broă cau tĕ khà gam sền gròi ngan. Bơnah hơ jơnau lùp, mblàng bơh 4 Bộ trưởng: Y tế, Lao động, Thương binh mờ Xã hội; Giáo dục mờ Đào tạo; Kế hoạch mờ Đầu tư kung bè tơngu me lơh loh tai ờ uă Bộ, gah lơh broă gơrềng bal là geh tơrgùm ngan, mùl màl mờ sơrmah sơrmài. Kuơ màng, tàm dơ̆ lùp mờ hơ jơnau lùp dơ̆ pơrjum do, jơnau đơs bơh Thủ tướng mờ ală Phó Thủ tướng neh lơh loh tai uă tơngu me kuơ màng, geh tơrgùm bal tơl ală bơta, jăk chài tàm broă đơng lam, lam sồr, broă tơnguh bơtàu lơh sa mpồl bơtiàn dà lơgar dê tàm bơta kòp Covid-19 gơtờp. Cau tĕ khà Nguyễn Huỳnh đơs, ồng đơs niam tơngu me jơnau lùp mờ hơ jơnau lùp tàm pơrjum mờ cồng nha đơng lam bơh Chính phủ. Ồng Nguyễn Huỳnh đơs tai: “Dơ̆ do iăt mờ sền dơ̆ lùp mờ hơ jơnau lùp bơh ală kuang bàng Quốc hội gơwèt mờ ală Bộ trưởng, đơs ngan añ gŏ tàm bơta tam gơl bơh kòp Covid-19 dê. Kòp gơtờp lơh mpồl bơtiàn tàm bơrlŭ bal, jơh ală broă đơng lam bơh Chính phủ kung pal di pal. Bơh tŭ kòp gơtờp tus tŭ do Chính phủ neh geh ală tam gơl di pal. Chính phủ geh uă broă lơh di pal ngan mờ bơta do. Añ gŏ dùl bơta bal là Đảng, Dà lơgar, Chính phủ ờ sŭk ngan, sền gròi mờ jòi tơl bơta nàng tàm bơta kòp gơtờp do lơh geh 2 jơnau kờñ dơ̆ lĕ bal là rơcang sơndră mờ kòp mờ tơnguh bơtàu broă lơh sa”.

Cau mblàng K’Duẩn