VOV4.K’ho- Chư Pưh lài do neh geh tŭ là kơnhoàl tam uă ngan tiêu bơh càr Gia Lai dê mơkung là kơnhoàl gơtìp gơrềng kơn jơ̆ ngan rlau jơh tài bơh tiêu gơtìp kòp lơh aniai mờ tăc ờ gŏ yòm tai. Tềng đăp ală bơta kal ke kơn jơ̆ ngan tài bơh priă lơh geh kuơmàng gơtìp ờ geh tai, ală kấp ủy Đảng mờ gơnoar ătbồ tàm kơnhoàl Chư Pưh tơlik kơnòl broă kuơmàng là jòi broă lơh dong ală thôn, ƀòn rơndăp tăp sèng wơl chi tam, phan ròng, kơ̆ kơl jăp wơl lơh sa. Bơta geh ngan tàm thôn Tung Đao, xã Ia Drêng, kơnhoàl Chư Pưh pà gŏ, tŭ chi bộ thôn gŏ geh ală kal ke kòl yan, gĭt loh geh bơta pràn bơta jak bơh tiah do dê, rềp mềl bal mờ làng bol jòi gùng dà bơsong, lơh sa mờ rài kis làng bol dê geh sơrbac mhar kơ̆ kơl jăp wơl.

Jơh sa tềp di mờr 2 nhai, ồng Ksor Neo, 72 sơnam ơm tàm thôn Tung Đao, xã Ia Drêng neh tăc dùl nơm kơnrồ mờ ià priă tàm tê lòt tus anih lơh broă bơh Ngân hàng Chính sách Xã hội kơnhoàl Chư Pưh dê nàng tơm ƀà dùl êt dồs gam ờ hềt tơm neh càn bơh nam 2017. Tơnơ̆ tŭ tơm, priă dồs bơh 6 tơlak đong gơmù gam wơl 3 tơlak đong. Ồng Ksor Neo pà gĭt, ồng tăc kòn kơnrồ geh mờr 7 tơlak đong, mơya jăt tơngai hơ tơm den mìng pal tơm 3 tơlak đong lơm. 4 tơlăk đong gam wơl, ồng lời wơl nàng dơ̆ ngui tàm rài kis mờ blơi dùl nơm măy ƀồm dà, tuh dà ai bă ù pa tam nhơ̆t tàm sươn. Ồng Ksor Neo gơlơh kờñ ngan bè cồng nha bơh broă càn priă ròng kơnrồ. Ồng đơs: Añ càn priă Dà lơgar dong kờl nàng ròng kơnrồ. Tơnơ̆ tŭ kơnrồ me deh kòn, den kơnrồ kòn he ròng, ai kơnrồ me den tăc nàng geh priă tơm dồs càn. Tus tŭ do, kơnrồ kòn neh dờng mờ deh 2 dơ̆ kòn rao, añ tăc tơm jơh priă dồs tờm mờ priă cồng neh càn. Añ gam wơl 2 nơm kơnrồ mờ geh cồng 10 tơlak đong.

Tàm tŭ ală cau dờng sơnam tàm thôn Tung Đao tơryăng tơryồng mờ broă ròng kơnrồ mờ geh priă jền sùm, den ală ùr bơklau pa bau ndai tàm do sùm gơlơh kờñ ngan mờ ală gùng dà lơh sa pa. Tàm khà hơ̆ geh ùr bơklau Ksor Uyn. Bơta cồng nha ngan bè tam gơl pa tàm broă lơh bơh ùr bơklau bi dê gơtùi gŏ tơn tàm broă tam chi sa plai. Đah sươn bơdìh, ală sèng tờm bơ, sầu riêng pa tam, ndrờm geh sơntơp mờ jrong dềt, geh căng càl mờ jàl đù mờ geh rơhe jơm tờm nàng gàr gơ in sùh iò. Tàm tiah sươn đah dơlam, rlau 400 tờm pơnăt sơntìl pa tam bơrlŭ bal mờ kơphê bơh bi Ksor Uyn dê neh geh plai dờng kàr bình thủy, geh sền gàr niam ngan, ờ lời ală plai gơ tam tŭp bal nàng pleh gơtìp tu kòp lơh aniai. Tàm săp ntas tuh dà sriêu srao, Ksor Uyn gơlơh kờñ ngan yal bè broă lùp bơsram ală broă lơh sa pa nàng lơh geh cồng nha lơh sa uă rlau. Bi Ksor Uyn, yal: Tŭ lòt lơh mờng gŏ cau dê tam pơnăt halà rài kis cau dê pas sơm, añ kờñ ngan, bơsram jăt is, mờ đòm jăt tam pơnăt bè do. Añ lùp broă khi lơh tơnơ̆ hơ̆ rê añ lơh jăt. Să tờm añ mờ broă lơh bơh añ dê kung ờ hềt chài ngan ờ, ờ hềt lơh geh cồng nha ờ. Nam lài, gơtìp virú den tàng ờ hềt lơh geh cồng nha lơi, nam do pơnăt neh geh plai mơya kung gam bơnung sơl, gơn kơnờm là geh niam bơnĕ đau.

Jăt ồng Phạm Đình Nghĩa Bí thư Chi bộ thôn Tung Đao yal, thôn geh 267 hìu bơnhă, mìng là làng bol jơi bơtiàn Jrai lơm. Tơnơ̆ bàr pe nam kal ke ngan tài bơh tiêu là tờm chi tam tờm gơtìp kòp chơ̆t mờ gar tiêu tăc ờ yòm ngan, làng bol tàm ƀòn neh di tŭ lơh jăt uă broă lơh sa pa nàng bơ̆t bơtàu wơl rài kis. Tàm gùng dà sơrlèt gan kal ke hơ̆, ală đảng viên lòt bal, lam lài tơn. Tơl nă đảng viên geh jàu tề lam dùl mpồl pơgăp 30 hìu bơnhă, bơto pơlam làng bol in bơta chài càn ală bơnah priă càn, jòi anih “tàp lơh” nàng lơh jăt ală broă lơh sa pa, mơkung kơlôi sơnơng kờp dŭ lơh sa bè lơi nàng gơ in dipal mờ priă càn geh. Ồng Phạm Đình Nghĩa pà gĭt, jơh 9 nă đảng viên tàm chi bộ mờ tơl hìu bơnhă làng bol ndrờm gĭt nền he là cau pal lòt lùp bơsram lài. Tiah lùp bơsram geh cồng nha ngan rlau jơh geh sền là sươn dờng bơh ală cau lơh broă sa jak tàm kơnhoàl, tàm xã dê, ală cau sơrbac mhar ngăc ngar mờ gam jak chài tàm broă lơh sa kă bro.

Ồng Phạm Đình Nghĩa, pà gĭt: Tơl nă đảng viên dờp dong kờl dùl ù tiah dềt, lơh ngan pah nam là tam gơl jơh bal bơta gĭt wă mờ broă lơh bơh dùl bơnah làng bol dê, mìng là làng bol cau Jrai lơm. Ai cau Yoan tàm xã den uă cau khi gam jak rlau mờ he, jak rlau uă ngan. Dùl là he jà ală cau hơ̆ đơs ƀà, tài bơh ờ geh broă mblàng yal lơi niam rlau mờ broă cau ngan broă ngan. He bal mờ làng bol lòt tus tàm hơ̆ nàng geh tŭ tìp măt tơm bơh bơr lùp bè broă bơtàu tơnguh, broă càn ală priă jền, bơta chài ngui măy mok mờ broă chài ngui priă càn, broă ătbồ...Lơh jăt broă hơ̆ den geh cồng nha rlau.

Tơnơ̆ rlau 3 nam lơh pràn tam gơl rơndăp tăp sèng lơh broă sa sươn sre, ală sơntìl kơphê pa pràn, uă bơta chi sa plai jŏ nam...neh geh tam uă tàm Tung Đao, bal mờ rlau 60 lồ bơh sơnrờp neh ai tơnhàu. Broă ròng siam kơnrồ mờng quèng kung gơguh tai uă ngan tŭ geh dùl êt hìu bơnhă ròng tus bàr pe jơ̆t nơm mờ gĭt tam tai nhơ̆t sơntìl pa mờ ờ gŏ di là ròng tơngklàs ê lềng bè lài do lơm. Ngan den tàng bè hơ̆, tàm tơngai bơh nam 2018- 2020 bềng bơta kal ke, Tung Đao kung gam gơmù geh sơl khà hìu rƀah bơh 6,7% gơmù gam 5,5%. Ồng Rmah Khanh, Kuang ătbồ thôn Tung Đao pà gĭt, tŭ do jơh dùl ƀòn kung gam sơl 16 hìu bơnhă rƀah, mơya kung geh uă sơl broă lơh sa pa lơh geh cồng nha, dipal nàng ală hìu bơnhă in lùp bơsram, lơh jăt. Chi bộ mờ Mpồl ătbồ is thôn dê đơs nền geh pơn jăt tai rềp mềl, lòt bal dong làng bol mhar kơ̆ kơl jăp lơh sa mờ klàs bơh rƀah.

Ồng Rmah Khanh, đơs: Añ là dùl nă đảng viên, geh ătbồ ơm bal mờ 30 hìu bơnhă làng bol cau Jrai. Tàm do geh dùl bơta chờ hờp là lài do tam tiêu geh giă mờ tơnơ̆ tŭ tiêu tăc ờ yòm ngan den geh kơphê kung di đau sơl tàm bàr pe nam do. Nam do, 2021, kơ̆p kờñ làng bol gĭt đòm jăt broă lơh sa pa jăt bơta bơto pơlam bơh Dà lơgar dê bè gĭt broă ròng kơnrồ, gĭt sơngkah sền gàr kơphê mờ gĭt lơh kòi sre bè lơi nàng gơ in lơh geh cồng nha. Gĭt tềm pềr, lơh jăt rài kis pa bè oh mi cau Yoan lơh sa gĭt kơlôi sơnơng mờ geh cồng nha.

Lam lơh wơl broă ròng kơnrồ, lơh pràn tam pa wơl kơphê, khin cha tam chi sa plai jŏ nam, làng bol jơi bơtiàn Jrai tàm thôn Tung Đao, xã Ia Drêng, kơnhoàl Chư Pưh, càr Gia Lai gam lơh geh ală cồng nha niam ngan bơh sơnrờp. Ală hoàc hươr geh sùm tàm broă lơh sa, gam rơhời geh bơsong bơh broă bơcri priă kơrhia, di bơta pràn. Mờ bơta dùl nùs bal bơh Chi bộ dê, mpồl ătbồ is thôn bal mờ ală hìu bơnhă làng bol dê, tơnơ̆ pah kàl lơh sa, thôn Tung Đao geh tai ală sươn mìr ƀô thồm plai chi, dong làng bol tàm do bơtàu tơnguh rài kis.

Cau cih Dương Đình Tuấn- Cau mblàng Lơ Mu K’Yến