VOV4.K’ho- Jat Nghị quyết bơh Chính phủ dê, ƀòn dờng Hồ Chí Minh lơh ngan gròi sền jai kòp lài mờ ngai 15/9/2021. Ală càr: Bình Dương, Long An, Đồng Nai lơh ngan gròi sền jai kòp lài mờ ngai 1/9/2021. Ală càr, ƀòn dờng ndai lơh ngan gròi sền jai kòp lài mờ ngai 25/8/2021. Nàng pơn jat tai tơrgùm kơryan kòp, lơh tus broă gròi sền niam kòp Covid-19, ờ lời gơlik geh bơta tung lơtang gah lơh sơnơm, lơh sa- mpồl bơtiàn, Chính phủ ring bal ai ngui Nghị quyết sồ 86 bè ală gùng dà broă lơh jal mhar rcang sơndră kòp Covid-19. Nghị quyết đơs loh ală gùng dà broă lơh jal mhar pal lam lơh.

Ngan ngồn bè do: Ngui ală broă lơh rcang sơndră kòp, ngan là lơh jat broă ai ơm yah ngài mpồl bơtiàn pal geh lam lơh ngan ngồn, lơh kràñ, pràn kơl dang, kràñ cê jơh nùs; sùm sồr ngan, lòt sền, kờp sền ală broă, ală bơta, broă lơh rcang sơndră kòp nàng rcang lài di pal mhar tŭ bơta kòp tam gơl. Jơh ală tiah sồr lơh jat niam jơnau đơs “lòt tơl sơnah ƀòn, teh tơl mpồng hìu, kờp sền tơl nă cau”, sền gŏ, bơsong tơn cau tus bơh tiah kòp halà tus bơh ù tiah ndai jat jơnau sồr bơh ală tiah dê; lơh glài kràñ ală cau lơh tìs, kờp bal mờ lơh glài kŭp jàm jat jơnau sồr bơh adat boh lam dê gơwèt mờ tơl broă lơh tìs ờ lơh jat, kơryan, tam dră mờ broă lơh jat ală jơnau sồr, broă lơh rcang sơndră kòp bơh anih lơh broă geh gơnoar dê.

Cau mblàng K’Hạnh