VOV4.K’ho- Nàng dong kờl mờ drơng broă di tŭ mờ geh cồng nha ai broă lơh rơcăng sơndră kòp Covid-19 tàm ƀòn dờng Hồ Chí Minh mờ ală tiah tàm tiah đah jum dà lơgar in, Thủ tướng Chính phủ pa kĭ sră nggal sồ 970 bè broă crơng gơs “mpồl lơh broă dờng màng” rơcăng sơndră kòp Covid-19.

Thủ tướng sồr ală Bộ trưởng, tàm hơ̆ geh: Bộ Quốc phòng, Bộ Công thương, Bộ Nông nghiệp mờ Phát triển Nông thôn; Bộ Giao thông- Vận tải; Bộ Xây dựng; Bộ Thông tin mờ Truyền thông; Bộ Lao động- Thương binh mờ Xã hội jăt tàm gơnoar broă, kơnòl broă, gơnăp gơnoar geh jàu, crơng gơs mhar tơn “Mpồl lơh broă dờng màng” rơcăng sơndră kòp Covid-19 bơh tơl Bộ dê, pơgồp bal niam ngan mờ ƀòn dờng Hồ Chí Minh bal mờ ală càr tiah đah jum dà lơgar, ngan là ală tiah gam lơh jăt Chỉ thị sồ 16 rơcăng lài bơsong, bơsong tơn ală kơnòl broă pa gơlik geh tàm broă lơh rơcăng sơndră kòp mờ ală broă geh gơrềng. Do là kơnòl broă kuơmàng ngan; jal mhar ngan; Thủ tướng Chính phủ sồr ală Bộ trưởng tơrgùm sồr lơh jăt, gờñ gơtùi lơh niam gơnoar broă bơh Mpồl lơh broă dờng màng dê.

Cau mblàng Lơ Mu K’Yến