VOV4.K’ho- Drim ngai 11/8, mut pơrjum dơ̆ sơn rờp bơh Chính phủ dê tơngai lơh broă bơh nam 2021 tus nam 2026 lam lơh jat Nghị quyết pơrjum dờng dơ̆ 13 bơh Đảng dê mờ Nghị quyết bơh Quốc hội khóa 15 dê bè bơtàu tơnguh lơh sa- mpồl bơtiàn 5 nam bơh nam 2021 tus nam 2025. Dơ̆ pơrjum geh lơh jat broă lơh pờ tơn tàm internet mờ ală càr, ƀòn dờng tàm gùt lơgar bơh Thủ tướng Chính phủ ồng Phạm Minh Chính đơng lam.

Đơs mut pơrjum, Thủ tướng Chính phủ ồng Phạm Minh Chính đơs nền, Chính phủ khóa 15 dờp kơnòl broă tàm tŭ tơngai tàm dunia mờ tàm lơgar geh ală tŭ niam, bơta ƀuơn mờ kal ke, bơta lòng tàm bơrlŭ bal, ngan là broă gơlik geh bơh kòp Covid-19 dê mờ jơi tam gơl să pa Delta gam gơlik geh kal ke ngan, ờ gơtùi git lài tàm dunia tàm tàm Việt Nam, pơhìn tus pràn kơldang să jan, màng kis bơh làng bol dê mờ lơh gơ rềng uă ngah tus tơl gah lơh sa- mpồl bơtiàn dà lơgar dê.

Mờ bơta tus bal bơh Tổng Bí thư mờ tơl làm ală kuang đơng lam bồ Đảng, dà lơgar dê, Chính phủ khóa 15 pơrjum gùt mpồl dơ̆ sơn rờp, kung là dơ̆ pơrjum kah yau, mờ nùs nhơm lơh ngan bơt bơtàu Chính phủ tam gơl pa, song dơpă, lơh broă, geh cồng nha, tài làng bol mờ drơng lơh. Pơrjum tơrgùm cribơyai, ring bal ală broă tờm, kuơmàng ngan rlau jơh tàm ală gah bơh dà lơgar dê tàm 5 nam tus.

Cau mblàng K’Duẩn