VOV4.K’ho- Yal tềng đap Quốc hội, làng bol mờ cau tĕ khà gùt lơgar tàm pơrjum dơ̆ 2, Quốc hội khóa 15, Thủ tướng Phạm Minh Chính pà git, nam 2021, tàm tŭ tơngai dà lơgar gơtìp uă kal ke, bơta lòng, ngan là dơ̆ bơtờp kòp Covid-19 dơ̆ 4 mờ jơi virus tam gơl să pa geh khà bơtờp mhar ngan, ngòt rơngơt uă rlau pơndrờm mờ jơi virus tờm lài do, sồr bol he pal ngui uă broă lơh rơcang sơndră kòp kràñ cê, jơh nùs, ờ hềt geh bơh lài tus tŭ do nàng lam lơh jơnau kờñ lài ngan là sền gàr pràn kơldăng să jan, màng kis bơh làng bol dê.

Bè gùng dà, kơnòl broă bơtàu tơnguh lơh sa mpồl bơtiàn nam 2022, Thủ tướng đơs loh nùs nhơm đơng lam, pơlam, tàm hơ̆ đơs nền: Lơh jat nùs nhơm bơtàu tơnguh jat Nghị quyết pơrjum dờng dơ̆ 13 bơh Đảng dê. Tơnguh bơta pràn mpồl tam klac dờng gùt jơi bơtiàn mờ mpồl lơh broă chính trị; tơnguh nùs nhơm brồ guh is, kơnờm tàm bơta pràn dơlam is là tờm, bơta pràn bơh bơdìh là kuơmàng mờ pal geh. Ơn màng kis, pràn kơldăng să jan làng bol dê lài ngan; hời rơ hời gơ dờp ờdo ờdă, ngac ngar, gròi sền geh cồng nha kòp Covid-19.

Cau mblàng K’Duẩn