VOV4.K’ho- Mho ngai 25/03, tàm hìu lơh broă Chính phủ, ồng Nguyễn Xuân Phúc Thủ tướng Chính phủ đơng lam dơ̆ tìp mat tơn jơh tơngai lơh broă Chính phủ khoá bơh nam 2016-2021. Đơs tàm dơ̆ tìp mat, ồng Nguyễn Xuân Phúc Thủ tướng Chính phủ đơs ngan, 5 nam do là tơngai lơh broă bềng bơta ngoh rơngăc, là ală nam, nhai pal kah ngan mờ să tờm Thủ tướng mờ uă Kuang bàng Chính phủ dê.

Chính phủ neh dùl nùs ring bal, dùl nùs dùl tồr bal sơr lèt gan uă bơta lòng. Ală Kuang bàng Chính phủ pơniờ să ngan neh lơh ngan tă pơgồp dà kơl hề, jơh nùs jơh tồr drơng broă dà lơgar, drơng broă làng bol in. Tơngŏ bơta ngoh rơngăc tềng đap bơta lơh ngan bal mờ ờ geh dùl nă Kuang bàng Chính phủ lơi ờ lơh ngan sơmbat tê bal àñ ơnòng tàm 5 nam do, Thủ tướng sền dờng màng, ưn ngài jơh ală Kuang bàng Chính phủ, ală anih lơh broă gơwèt Chính phủ sùm lơh broă bal, dong kờl Thủ tướng lơh sir kơnòl broă mờ Đảng, Dà lơgar jàu.

Thủ tướng kơ̆p kờñ ală Kuang bàng Chính phủ, bulah tơngai tus ơm tàm gơnoar broă lơi halà neh jơh sơnam lơh broă, kung gam pơn jat tai lơh jat niam nùs nhơm kăc màng, tă pơgồp ai Đảng, ai làng bol, ai dà lơgar in, pơgồp bơnah lơh dà lơgar Việt Nam pas sơm, lơngap lơngai.

Cau mblàng K’ Hạnh