VOV4.K’ho- Mho ngai 11/8, bơh bơta đơng lam, sồr lơh bơh Thủ tướng Chính phủ ồng Phạm Minh Chính dê, Chính phủ neh pơrjum bè broă lơh rcang sơndră kòp Covid-19; bơta bơtàu tơnguh lơh sa- mpồl bơtiàn nhai 7 mờ 7 nhai nam 2021; ală kơnòl broă, gùng dà broă lơh tờm tă bơsong bơta kal ke kòl yan, bơtàu tơnguh lơh sa- mpồl bơtiàn ală nhai lồi nam 2021 jat broă lơh pờ tơlik tơn tàm internet đah anih tàm tơrbŏ bal Chính phủ mờ ală tiah tàm gùt lơgar.

Jat Thủ tướng, do là 2 kơnòl broă kuơ màng song bal mờ geh bơta gĭt gơ̆p niam, rềp mềl bal. Jat jơnau sồr bơh Thủ tướng dê, Kuang đơng lam bồ ală càr, ƀòn dờng mờ ală Kuang bàng Chính phủ tơrgùm mblàng sền ală cồng nha, cồng nha neh lơh geh mờ ală bơta ờ hềt pràn tàm broă lơh jat ală kơnòl broă tàm tơngai pa do; ai tơlik ală jơnau bơsram mờng chài, ngan là tàm broă rcang sơndră kòp Covid-19 mờ bơtàu tơnguh lơh sa, kă bro; jơnau kờp dŭ lài ală bơta, ngan là ală bơta kal ke, bơta ƀuơn, bơta lòng; cribơyai ală gùng dà broă lơh, kơnòl broă, broă lơh lơh jat ală nhai lồi nam dê.

Cau mblàng K’Hạnh