VOV4.K’ho – Tàm Hìu lơh broă Chính phủ, Phó Thủ tướng, ồng Vũ Đức Đam đơng lam dơ\ pơrjum Mpồl đơng lam làm gah dà lơgar bè kloh niam ờ do ờ dă phan sa. Bơta geh cribơyai uă là ală broă lơh gàr kloh niam ờ do ờ dă phan sa tàm tơngai lồi nam mờ sa tềp nam 2018 mờ cribơyai rơndap lơh Nghị định cih mùl màl lơh jat ờ uă bơta bơh Adat ờ do ờ dă phan sa.

Nam 2017, ală anih lơh broă mờ ală tiah neh geh uă broă lơh ngan tàm broă gàr kloh niam ờ do ờ dă phan sa, uă bơta neh tam gơl loh làng ngan. Gơ jat bal mờ hơ\ là bơta sền gàr tiah ơm kis. Nam 2018, Phó Thủ tướng sồr lơh ngan lơh sa geh cồng nha, tơr gùm lùp sền, sền sơwì, lơh glài broă lơh tìs, ngan là tàm tu\ Adat hình sự pa geh ai ngui.

           Cau cih mờ yal tơnggi K’Duẩn