VOV4.K’ho- Mho ngai 06/12, tàm Hìu duh broă Chính phủ dê, Phó Thủ tướng Chính phủ ồng Lê Minh Khái- Kuang ătbồ Mpồl lơh broă sồ 02 bơh Thủ tướng Chính phủ dê bè lơh pràn ai priă jền bơcri priă dà lơgar đơng lam dơ̆ pơrjum pờ tơn tàm internet mờ ală Ƀộ, Gah sơnah lơh broă dà lơgar mờ 6 tiah, là: Ƀòn dờng Cần Thơ, ală càr: Long An, Trà Vinh, Hậu Giang, Sóc Trăng mờ Kiên Giang nàng kờñ tă bơsong ală kal ke kòl yan nàng lơh pràn ai priă jền bơcri priă dà lơgar dê nam 2021.

Đơs tàm pơrjum, Phó Thủ tướng ồng Lê Minh Khái đơs nền, nam do tài gơrềng bơh kòp dờng Covid-19 dê tàm hơ̆ ală càr tàm Tiah ring dà dờng Cửu Long gơtìp gơrềng kơn jơ̆ ngan bal mờ ală jơnau ờ ƀươn ƀoài den tàng khà ai priă jền bơcri priă dà lơgar dê gam lơyài, priă ODA mìng geh 29% broă rơndăp lơh lơm. Phó Thủ tướng ồng Lê Minh Khái sồr, ală Ƀộ, Gah lơh broă dà lơgar, kuang đơng lam bồ 6 tiah do lam lơh niam ală Kơrnoăt bơh Chính phủ dê lơh pràn ai priă jền bơcri priă dà lơgar jăt di broă rơndăp lơh neh hơ pơrgon, jăt mờ hơ̆ tơrgùm kờp sền wơl tơl bơh dùl rơndăp broă lơh sền bơta kal ke kòl yan tus kàr lơi den bơsong tus kàr hơ̆, ngan là rơcăng lài lơh broă mờ ală cau bơcri priă sồr pal lơh jăt di tơngai, mơkung tă bơsong ală kal ke kòl yan gơbàn tàm ală tŭ lam lơh ală rơndăp broă lơh.

Cau mblàng Lơ Mu K’Yến