VOV4.K’ho- Mờ nùs nhơm ai nùs nhơm lơh ki ngàm, drim ngai 26/5 tàm hìu phờk Quán Sứ, Hà Nội, Gah jat yàng Phờk Việt Nam bơyai lơh sơñio rùp tơn pờ tơlik tàm internet Chờ dờng Phờk Đản- Phờk Lịch 2565- nam Tây 2021. Thủ tướng Phạm Minh Chính neh pơyua guàng bơkàu nting bơr gờm chờ. Broă lam lơh geh ală Chư tôn đức tăng ni Hội đồng dong broă bơyai lơh is mờ sơñio rùp tơn tus tiah tam bảo ai ală cau jat yàng phờk geh mat tàm hìu phờk mờ sơñio rùp tơn tàm mạng xã hội bơh Gah jat yàng Phờk Việt Nam mờ tàm gah sơñio rùp An Viên tus cau jat yàng phờk gùt lơgar in.

Tài kòp bơtờp gơlik geh kal ke den tàng jơh ală cau jat yàng phờk tus bal dơ̆ bơyai lơh ndrờm lơh jat nền nòn jơnau sồr 5K mờ lơh jat broă bơyai lơh mờ nùs nhơm ki ngàm. Thượng tọa Thích Đức Thiện, Tổng Thư ký, Phó Chủ tịch Hội đồng dong broă gah jat yàng Phờk Việt Nam pà git, do là broă kuơmàng ngan, ờ mìng dong cau jat yàng phờk ai tơnggŏ nùs nhơm ki ngàm gơ wèt mờ yàng Phờk bơh broă lơh tơn um Phờk, mờ gam ai tơnggŏ nùs nhơm lơbơn niam, tam klac bal, at tê bal mờ Gah jat yàng Phờk Việt Nam, lòt bal mờ jơi bơtiàn tàm broă lơh kơryan kòp dờng.

Cau mblàng K’Duẩn