VOV4.K’ho- Drim ngai 26/4, ồng Phan Diễn, Chủ tịch kes priă mpồl bơtiàn rơcang sơndră trồ tiah lơh aniai gơ wèt Viện Tài Nguyên mờ Môi trường – Hìu bơsram Đại học dà lơgar Hà Nội lam bồ mpồl kuang bàng neh geh dơ̆ lơh broă mờ càr Gia Lai bè 2, 3 tơngume tàm broă atbồ, sền gàr mờ bơtàu tơnguh brê. Jơnau yal tàm dơ̆ lơh broă ai gŏ, 5 nam do, bă ù tam brê tàm Gia Lai geh rlau 25 rbô lồ. Tus lồi nam 2020, khà jơm glòm brê tàm càr do geh 46,7%; broă atbồ, sền gàr brê; rơcang sơndră crùh ồs sa brê geh sền gròi đơng lam.

Kes priă mpồl bơtiàn rơcang sơndră trồ tiah lơh aniai lơh broă tàm càr Gia Lai

Đơs tàm dơ̆ lơh broă, ồng Phan Diễn tam pà bal mờ càr bè ală kal ke gam pal kong. Kes priă gơtùi dong càr bơt bơtàu rơndap broă dong làng bol tàm 2, 3 tiah tam tờm chi dơm dờng jŏ ngai ala mờ tam tờm chi dơm dềt koh kơl mhar; halà tam bơrlŭ tàm suơn kơphe ờ mìng tơnguh priă jền lơh geh, mờ gam tơnguh bơta kuơ rơcang gàr ù in tai. Bulah bè hơ̆, càr kung pal geh broă lơh dong kờl jòi broă lơh ai làng bol in tàm tơngai dờng pràn kuơmàng nàng khi iang nùs sơngka sền gàr brê mờ tơn jŏ tơngai kis jŏ bơh brê lơh sa dê.

Cau mblàng K’Duẩn