VOV4.K’ho- Drim ngai 22/11, tàm Hà Nội, Chủ tịch lơgar ồng Nguyễn Xuân Phúc còp mờ lơh broă mờ Anih tờm nhiệt đới lơgar Việt Nam mờ lơgar Nga. Đơs tàm dơ̆ lơh broă, Chủ tịch lơgar ồng Nguyễn Xuân Phúc đơs, git gơp lơh broă bal kuơmàng tơl làm đah Việt Nam mờ Nga ngai sơlơ geh gàr kơ̆ mờ geh bơta bơtàu tơnguh pa, tơl làm jơh ală bơta, ngan ngồn, ngan là tàm lơh broă bal lơh sa, kă bro, sền gàr dà lơgar, sền gàr lơngap lơngai, khoa học mờ công nghệ.

Đơs ală jơnau sồr kuơmàng nàng lơh ngan tus nam 2030 lơgar he gơ gơs là lơgar gam bơtàu tơnguh, geh broă lơh sa mờ măi mok pa, Chủ tịch lơgar sồr Anih tờm pal geh ală broă lơh tă pơgồp tàm jơnau kờñ do, lơh ngan bơt bơtàu Anih tờm gơs anih khoa học- công nghệ geh bơngă pin dờn, ờ uă gah geh bơta chài kấp kơnhoàl ù tiah lơgar rềp bal mờ dunia gơtùi tus bal mờ lam lơh ală broă lơh khoa học kuơmàng bơh dà lơgar mờ Bộ Quốc phòng dê, pơn jat tai là anih pin dờn tàm git gơp lơh broă bal lơh bơyô đah Việt Nam mờ Nga.

Cau mblàng K’Duẩn