VOV4.K’ho- Kung tàm dơ̆ lòt còp gĭt gơ̆p lơh bơyô ngan ngồn lơgar Lào sơl, ồng Nguyễn Xuân Phúc- Chủ tịch lơgar mờ pơ ùr neh tus còp să, tơm bơh bơr mờ cau lơh broă tàm Đại sứ quán lơgar Việt Nam tàm lơgar Lào mờ ala măt mpồl bơtiàn cau Việt Nam, mpồl lơh sa kă bro, kơnòm bơsram Việt Nam gam bơcri priă mờ bơsram sră tàm lơgar Lào.

Ồng Nguyễn Xuân Phúc- Chủ tịch lơgar đơs nền, dơ̆ lòt còp neh lơh geh cồng nha tơl làm, do là kơnòm bơh bơta tă pơgồp mờ lơh broă geh cồng nha bơh Đại sứ quán dê bal mờ bơta dùl nùs bal bơh mpồl bơtiàn cau Việt Nam gam ơm kis mờ lơh broă tàm lơgar Lào dê. Chủ tịch lơgar đơs sùm, 100 rbô nă cau Việt Nam tàm lơgar Lào ndrờm sùm kah tus hờ dà lơgar mờ jơh nùs dong kờl làng bol tàm lơgar tŭ tìp kal ke gơ tŭ gơ tơl tài bơh trồ tiah lơh aniai mờ kòp Covid-19. Jăt tàm nùs nhơm hơ̆, ồng Nguyễn Xuân Phúc- Chủ tịch lơgar kơ̆p kờñ mpồl bơtiàn cau Việt Nam tàm do pơn jăt tai đòm jăt bơhiàn bơh yau, nàng tơl nă cau kòn ù tiah Việt Nam kis mờ lơh broă tàm lơgar Lào là dùl krơh àng, dipal mờ măt hòi là cau Việt Nam.

Cau mblàng Lơ Mu K’Yến