VOV4.K’ho- Mho ngai 14/7, tàm Gơlang Chủ tịch, Chủ tịch lơgar ồng Nguyễn Xuân Phúc neh geh dơ̆ cribơyai tàm điện thoại mờ Kuang atbồ lơgar Rumania ồng Klaus Werner Iohannis. Tàm dơ̆ cribơyai tàm điện thoại, 2 nă kuang đơng lam bồ neh cribơyai uă broă lơh ngan ngồn kờñ sơlơ rề ơnàng mờ lơh niam rlau tai git gơp đah 2 lơgar, ring bal gàr sùm mờ tơnguh ală cơ chế cribơyai 2 lơgar mờ kung tơnguh lơh broă bal tàm 2, 3 gah geh ai lơh lài bè lơh sa- kă bro, bơto bơtê mờ bơsram, lơh broă bal cau lơh broă.

Chủ tịch lơgar ồng Nguyễn Xuân Phúc

Kuang atbồ lơgar Rumania yal, bơh git gơp lơh bơyô niam bơnĕ đah 2 lơgar, Chính phủ Rumania neh lơh nền pà Việt Nam in 100 rbô ding sơnơm vaccine AstraZeneca kung bè geh sền sơwì jơh nùs broă lời wơl dùl khà sơnơm vaccine ai Việt Nam in tàm tơngai tus. Chủ tịch lơgar ồng Nguyễn Xuân Phúc ai tơnggŏ nùs nhơm ưn ngài ală nùs nhơm kuơmàng mờ dong kờl di tŭ mờ Kuang atbồ lơgar kung bè làng bol lơgar Rumania lời ai lơgar Việt Nam in tàm tŭ gam gơtìp uă kal ke, đơs nền khà sơnơm vaccine do geh pơgồp bơnah ngan ngồn tàm broă lơh rơcang sơndră kòp Covid-19 bơh lơgar Việt Nam dê.

Cau mblàng K’Duẩn