VOV4.K’ho- Drim ngai 07/12, tàm Gơlăng Chủ tịch, Chủ tịch lơgar ồng Nguyễn Xuân Phúc, Chủ tịch Mpồl duh broă sền gàr dà lơgar mờ sền gàr lơngap lơngai neh đơng lam pơrjum dơ̆ 1 Mpồl duh broă sền gàr dà lơgar mờ sền gàr lơngap lơngai tơngai lơh broă bơh nam 2021 tus nam 2026.

Tàm pơrjum, Mpồl duh broă neh cribơyai, ai jơnau đơs bè broă lơh pơgồp bal đah ală mpồl ling, kuang àng mờ ală Bộ, mpồl, gah broă lơh, ală càr, ƀòn dờng tàm rơcang sơndră kòp Covid-19; chồl pràn broă ai mpồl ling tus bal tàm mpồl sền gàr ring lơngai bơh Liên hợp quốc dê; broă lơh sền gàr lơngap lơngai tàm internet mờ lơh broă bal tam lơh tàm internet tàm tơngai tŭ do. Bè broă lơh nam 2022, Chủ tịch lơgar, Chủ tịch Mpồl duh broă đơs nền tus jơnau sồr git loh broă gơlik geh, rơcang lài bơt bơtàu broă rơndap lơh di mờ broă gơlik geh tàm tiah do mờ tàm dunia.

Chủ tịch lơgar sồr ală kuang geh jơng, anih lơh broă bơh Mpồl duh broă dê tơnguh gơnoar broă tàm broă lơh sền gàr dà lơgar, sền gàr lơngap lơngai dà lơgar dê. Kuơmàng là rơcang lài sơndră mờ ală bơta lòng lơngap lơngai ờ ờs mờng jơh bal tềng đap mat mờ jŏ jòng. Gơ jat bal mờ hơ̆ là sơlơ tơnguh bơta pơgồp bal jơh nùs tàm sền gàr dà lơgar, sền gàr lơngap lơngai mờ lơh broă mờ lơgar ndai, chồl pràn lơh broă mờ lơgar ndai sền gàr dà lơgar, sền gàr lơngap lơngai dà lơgar bơh gờñ, bơh ngài.

Cau mblàng K’Duẩn