VOV4.K’ho-Drim ngai 26/8, tàm Hà Nội, Mpồl đơng lam tam gơl pa sền gàr adat boh lam dà lơgar neh pơrjum dơ̆ 13 bơh bơta đơng lam bơh ồng Nguyễn Xuân Phúc- Chủ tịch lơgar, Kuang atbồ Mpồl đơng lam nàng cribơyai, ai jơnau đơs bè cồng nha lơh jat rơndap broă lơh: “Tam gơl pa mờ lơh sir broă lơh làng bol tus bal cah rơña tàm Anih cah rña di pal mờ jơnau sồr tam gơl pa sền gàr adat boh lam dê” mờ “Jơnau yal dan jơnau đơs bè gùng dà broă lơh ai ngui Kơrnoat bơyai lơh dơ̆ cah rña pờ tơlik tơn tàm internet tàm Anih cah rña dê”. Do là 2 tơngume bơh Mpồl đơng lam Kuang bàng Đảng Anih cah rña làng bol dờng ngan rlau jơh yal mờ ai jơnau đơs bơh Mpồl đơng lam tam gơl pa sền gàr adat boh lam dà lơgar dê ai jơnau đơs lài mờ tŭ yal mờ ală anih lơh broă geh gơnap gơnoar in sền sơ wì, lơh nền, mờ gùng dà broă lơh là lơh jat tam gơl pa sền gàr adat boh lam tàm tơngai tus.

Tơnơ̆ tŭ iăt, kơno jơnau đơs cribơyai bal bơh ală kuang bàng tàm Mpồl đơng lam dê, ồng Nguyễn Xuân Phúc đơs ngan pal pơn jat tai lơh jat jơnau kờñ tam gơl pa jat jơnau sồr tàm Nghị quyết Pơrjum dờng dơ̆ 13 mờ lài ngan là ală broă lơh sền gàr adat boh lam. Mpồl gơnoar cih tơrgùm wơl tơl làm ală jơnau đơs tă pơgồp bal, cribơyai nàng gờñ geh jơnau đơs pơn dŭt, lài ngan là Kơrnoat bơyai lơh dơ̆ cah rña pờ tơlik tơn tàm internet tàm Anih cah rña dê; bơh hơ̆ lơh geh tơl bơta niam ai broă lơh cah rña pờ tơlik tơn tàm internet ngan ngồn gờñ geh lam lơh tàm bơta geh ngan.

Cau mblàng K’Hạnh