VOV4.K’ho- Chủ tịch lơgar ồng Nguyễn Xuân Phúc pa geh sră jờng rơ Tổng Liên đoàn Lơh broă Việt Nam bè broă hòi jà mờ lam lơh jăt geh cồng nha Broă lơh “75 rbô jơnau bơceh lơh, sơrlèt gan kal ke, bơtàu tơnguh” tàm dơ̆ tơngkah kir sơnrai 75 nam Ngai Dunia Lơh broă tàm Việt Nam. Broă hòi jà tàm đoàn viên công đoàn, công nhân, công chức, viên chức, cau lơh broă bơh ală kấp, ală gah, ală anih lơh broă, mpồl cau, mpồl lơh sa kă bro tàm jơh gùt lơgar.

Chủ tịch lơgar đơs “75 rbô jơnau bơceh lơh, sơrlèt gan kal ke, bơtàu tơnguh” là broă lơh geh kuơ ngan tài lơh broă lơh sa là jơnau tờm lơh gơlik geh phan bơna jơtài mờ bơta pas gơs bơh dà lơgar dê. Broă lơh dong lơh tơngkah wơl mờ gơhòi gơ jà jơnau bơceh lơh bơta niam chài pa tàm anih lơh broă, mpồl cau, mpồl lơh sa kă bro: Tơl nă cau lơh broă ndrờm tơryăng tơryồng, jơh nùs jơh tồr, kơlôi sơnơng sùm, tă pơgồp tàm bơta bơtàu tơnguh bơh mpồl tiah he lơh broă dê. Chủ tịch lơgar tơngŏ nùs nhơm pin dờn mờ nting săp kơ̆p kờñ Tổng Liên đoàn Lơh broă Việt Nam pơn jăt tai lơh jăt niam Broă lơh “75 rbô jơnau bơceh lơh, sơrlèt gan kal ke, bơtàu tơnguh”, pơn jăt tai geh uă broă lơh geh kuơ ngan mờ lơh gơrề jrô ơnàng làm uă, pơgồp bơnah lơh tơnguh tai bơta pin dờn mờ bơta kơ̆p kờñ ngan lơh ngan ai dùl dà lơgar Việt Nam dờng pràn pas gơs mờ chờ hờp.

Cau mblàng Lơ Mu K’Yến