VOV4.K’ho- Ngai 30/7, tàm ƀòn dờng Hồ Chí Minh, ồng Nguyễn Xuân Phúc- Chủ tịch lơgar lơh broă mờ Kuang đơng lam bồ tờm ƀòn dờng Hồ Chí Minh. Chủ tịch lơgar đơs ngan jơnau kờñ lài ngan, hơđang rlau jơh ngan mờ kuơ màng ngan rlau jơh tŭ do là sền gàr pràn kơl dang să jan mờ bơta ờdo ờdă să jan bơh làng bol dê, tơrmù uă ngan rlau jơh khà cau chơ̆t.

Jat hơ̆, kơnòl broă tờm ngan là pal lơh jat gơtùi broă lơh ai ơm yah ngài jat Chỉ thị sồ 16, mờ kờñ lơh jat gơtùi den pal drơng gàr gơtùi rài kis làng bol in, bañ lời làng bol jơgloh. Gơwèt mờ ƀòn dờng rlau 10 tơlak nă làng bol bè ƀòn dờng Hồ Chì Minh, broă sơndră kòp kal ke ngan, Chủ tịch lơgar jờng rơ Kuang đơng lam ƀồ, ală anih lơh broă chính trị ƀòn dờng Hồ Chí Minh dê neh geh ală broă lơh nền di tŭ, lila, uă ngan nàng rcang sơndră kòp, di tŭ lơh jat ală broă lơh gàr tơl niam rài kis mpồl bơtiàn, di tŭ lơh pa 16 nơm Hìu sơnơm ing dờng ơnàng, kờp jơh geh mờr 50 rơbô nơm jơnờng.

Tàm dơ̆ lơh broă, Chủ tịch lơgar pà gĭt, neh hòi jà ală cau geh nùs nhơm niam tàm lơgar mờ lơgar ndai dong kờl ƀòn dờng Hồ Chí Minh in 103 tơmàn đong mờ 10 nơm măy tă nhơm bal mờ uă phan bơna, sơnơm tơm ƀa. Tàm hơ̆, mpồl lơh sa kă bro gah Ngân hàng dong kờl 50 tơmàn đong, Ngân hàng Sacombank dong kờl 30 tơmàn đong, mpồl lơh sa kă bro lơgar ndai tă pơgồp bal dong kờl 1 tơlak dolar Mỹ.

Cau mblàng K’Hạnh