VOV4.K’ho- Mho ngai 01/7, tàm Gơlăng Chủ tịch lơgar, ồng Nguyễn Xuân Phúc- Chủ tịch lơgar, Kuang ătbồ Mpồl đơng lam bơ̆t bơtàu Rơndăp broă lơh neh geh dơ̆ lơh broă mờ uă giáo sư, phó giáo sư, tiến sĩ, ală cau mờng chài tàm gah lơh broă jak chài kơrnoat boh lam nàng iăt kơno tă pơgồp jơnau đơs tàm Rơndăp broă lơh jŏ jòng Bơ̆t bơtàu mờ lơh sir gơs dà lơgar gơnoar kơrnoat boh lam xã hội chủ nghĩa. Đơs tàm dơ̆ lơh broă, ồng Nguyễn Xuân Phúc đơs sùm, Rơndăp broă lơh hơ̆ ngan là “hwềng nùs” tàm broă lơh niam wơl sền gàr adat boh lam, pơn jăt tai bơ̆t bơtàu dà lơgar gơnoar kơrnoat boh lam xã hội chủ nghiã Việt Nam.

Jăt tàm nùs nhơm hơ̆, Chủ tịch lơgar sồr ală cau mờng chài, cau jak chài pơgồp jơnau đơs tàm bàr pe tơngume bè bơnah broă bơh rơndăp broă lơh dê; bè tăp, sèng, broă rơndăp lơh bơh Rơndăp broă lơh dê; bè tơngume kơlôi sơnơng; bè ală tơngume ờs mờng jrô ơnàng bơh Rơndăp broă lơh dê; broă jàu kơnòl ală anih lơh broă in lơh jăt ală tơngume...mờ ală tơngume ndai mờ ală cau mờng chài, cau jak kơ̆p kờñ tă pơgồp jơnau đơs.

Chủ tịch lơgar đơs nền, ală jơnau đơs tă pơgồp tàm dơ̆ lơh broă dơ̆ do geh iăt kơno wil tơl tàm ală tŭ lơh sir gơs Broă rơndăp lơh bơ̆t bơtàu Rơndăp broă lơh. Mpồl đơng lam geh pơn jăt tai dan jơnau đơs ală cau mờng chài, cau jak chài dê, pờ ală dơ̆ cribơyai tàm bàr pe gah broă lơh krơi is nàng iăt kơno ală jơnau đơs tă pơgồp bè Rơndăp broă lơh.

Cau mblàng Lơ Mu K’Yến