VOV4.K’ho- Drim ngai 18/8 Chủ tịch lơgar ồng Nguyễn Xuân Phúc neh đơng lam dơ̆ lơh broă mờ kuang đơng lam bồ tờm ngan bơh càr Bắc Giang dê bè broă lam lơh kơnòl broă lơh sa- mpồl bơtiàn. Đơs tàm dơ̆ lơh broă, Chủ tịch lơgar ồng Nguyễn Xuân Phúc đơs niam Đảng bộ, gơnoar atbồ mờ làng bol càr Bắc Giang neh geh uă broă lơh sơndră kòp jơh nùs, geh cồng nha, uă jơnau kờñ. Bè hơ̆ den tàng tơnơ̆ rlau 2 nhai sơndră kòp geh cồng nha, 36 ngai do, Bắc Giang neh ờ geh cau kòp pa. Nùs nhơm bơtàu tơnguh wơl lơh sa kă bro duh hồl ngan. Do là cồng nha jak ngan, tă pơgồp tàm cồng nha bal bơh gùt lơgar dê mờ là mờng chài niam gơ wèt mờ uă tiah tàm gùt lơgar.

Mùl màl, càr neh kơryan geh cồng nha kòp mut tàm 4 anih lơh sa mờ măi mok dờng. Tàm tơngai gơbàn kòp, Bắc Giang kung gam bơyai lơh geh cồng nha tĕ khà Kuang bàng Quốc hội mờ Hội đồng Nhân dân ală kấp. Bal mờ hơ̆, càr neh lơh geh cồng nha niam bè lơh sa bè tac hờ lơgar ndai, tă dia. Di tŭ do, ala mat kuang đơng lam bồ Đảng, dà lơgar, Chủ tịch lơgar ồng Nguyễn Xuân Phúc neh jàu Huân chương lơh broă khà 3 ai Đảng bộ, gơnoar atbồ mờ làng bol càr Bắc Giang in bè ală cồng nha jak ngan tàm broă lơh rơcang sơndră kòp Covid-19.

Cau mblàng K’Duẩn